لغز "اختفاء" الناطق الرسمي باسم الحكومة. كيفاش دار بايتاس تدبير كارثي لموعد ضروري للحكومة

تفاجأ عدد من الصحفيين والمراسلين الدوليين، من إلغاء الندوة الصحافية الأسبوعية للناطق الرسمي باسم الحكومة مصطفى بايتاس، اليوم الخميس.
الإلغاء اللي مكانش فراس حتى صحفي، خصوصا وأن بايتاس كان غايدير ندوة مع الواحدة زوالا ولكن جاه تلفون من لفوق باش يترأس وفد الحجاج. طبعا المكلفين بالتواصل عندو دارو خدمتهم وخبرو الصحفيين بلي كاين طارئ عند الوزير.
اللي مكلفين بالتواصل صيفطو مساج للصحافة فيه :"مرحبا الزملاء الأعزاء، تم تأجيل الندوة إلى الساعة السادسة زوالا لالتزام طارئ للسيد الوزير.".
فاتت السادسة مساءا والوزير مدارش ندوة صحافية ولوزير ما بان ليه اثر. ما خرج خبار، ما تواصل ما والو فندوة اسبوعية ضرورية. هادي فيها احتقار لراسو قبل ما يحتاقر لمغاربة والصحافيين. واحد مكلف بالتواصل وما قادرش يتواصل هو. دار تدبير كارثي لهاد القضية
"كود" جابت الخبار ديال سبب تأجيل الندوة متعلق بتكليف بايتاس برئاسة الوفد لي غايمشي للحج. مع العلم ان السنة الماضية كان وزير العدل عبد اللطيف وهبي، هو لي مشا فرئاسة الوفد ديال الحجاج، لكن هاد العام مغاديش وغادي يرومبلاصيه بايتاس.
وهبي عندو موعد مع طبيب ديالو الخاص فباريس باش يشوف حالتو .