ما حققو تا مكتسب ليها.. برلمانيين أوروبيين دايرين وقفة فمقر البرلمان كيدعمو فيها البوليساريو

Elouali.zaz.1987@gmail.com
نظم عدد من البرلمانيين الأوروبيين الموالين لجبهة البوليساريو، اليوم الثلاثاء، وقفة بمقر البرلمان الأوروبي في ستراسبوگ الفرنسية، فسياق الترويج للبوليساريو ولمسألة رفضها لإتفاقية الصيد البحري بين المغرب والإتحاد الأوروبي لي غادي تسالي 17 يوليوز الجاري.
البرلمانيين الأوروبيين لي أغلبهم من المجموعة البرلمانية الداعمة للبوليساريو عبرو على رفضهم لإستغلال الثروات الطبيعية فالصحرا، وكيطالبو الإتحاد الأوروبي بأنه ما يدير أي إتفاقية مع المغرب لي كتشمل الصحرا.
هاد المجموعة البرلمانية لي رئيسها النمساوي أندرياس شيدر فشلات طيلة سنوات فأنها تحقق اي مكتسب للبوليساريو فمعركة حقوق الإنسان والثروات الطبيعية وخدمتها بقات محدودة فندوات تعريفية لأطروحة البوليساريو من نزاع الصحرا فالوقت لي فشلات فيه أيصا فإستقطاب نواب اوروبيين عندهم وزن.
نفس هاد المجموعة غادي دير ندوة عاد السيمانة فالبرلمان الأوروبي تناقش فيها قضية إتفاقية الصيد البحري بين الإتحاد الأوروبي والمغرب ولي كتشمل مياه الأقاليم الجنوبية.
اتفاقية الصيد البحري بين المغرب والإتحاد الأوروبي غادي تسالي نهار 17 يوليوز وما كاين حتى مفاوضات باش يتم تمديدها فإنتظار حكم المحكمة لي غادي يحسم فالملف، واخا توقيف هاد الإتفاقية عندو سلبيات كبيرة لأن نشاط الصيد البحري هو رافعة لتنمية الصحرا من خلال إستثمار عوائدو فتنميتها وترقية الوضع السوسيو إقتصادي، وكانت هاد التنمية هي لي خلات الإتحاد الأوروبي من قبل أنه يجددها مع المغرب تحت يافطة أنه لا يمكن رهن تنمية المنطقة بالمسار السياسي ديال النزاع لي كترعاه الأمم المتحدة.