بودريقة: ملي شدينا الرجاء لقينا الفوضى والانفلاتات فالفريق وأمور لا تشرف النادي وها بشحال كنخلصو زينباور

كشف محمد بودريقة رئيس الرجاء الرياضي شحال تقريبا قيمة التعاقد اللي دار النادي مع المدرب الألماني جوزيف زينباور، اللي خذا بلاصة التونسي منذر الكبير، وأكد أن المدرب الجديد عندو غرض المشروع الرياضي كثر من لفلوس وراه عطاوه جميع الصلاحيات.
وطل محمد بودريقة على جماهير الرجاء الرياضي على صفحة النادي بفيسبوك الاربعاء، باش يشرح لهم الوضع د الفريق وقال: "جوزيف زينباو كياخذ كثر من نصف داكشي اللي كان كياخذ الطاقم التقني السابق واللي كان كيوصل ما بين الصالير والمنح إلى 100 مليون سنتيم فالشهر".
وأكد محمد بودريقة: "الصالير ديال المدرب ما كيعكسش القيمة الثقنية ديالو حيث كان كيشد فجنوب إفريقيا وروسيا كثر من 100 مليون، هو قاليا كيهمو الجانب الرياضي كثر من المادي وبالتالي تمشى مع الخطة اللي راسمين والأمور جديدة، وطاقم اللي مع زينباو مكون من 6 أشخاص كانت عندو الصلاحية فاختيارهم، وحنا عطيناه الصلاحيات حتى فالتعاقدات".
وكشف بودريقة على الوضع اللي لقى فيه الفريق ملي طلع للرئاسة هو المكتب ديالو، فبلاصة الرئيس السابق عزيز البدراوي، وأكد أن الخضرا كانت غارقة فوضى.
وقال محمد بودريقة : "عندنا 72 لاعب أي 72 عقد احترافي بالفريق الاول، وهذا صعيب يكون بفريق محترف وراه واقع مرير ونتيجة تراكمات لسنوات سابقة".
وكمل بودريقة وقال: "الأمور اللي كانت فالفريق الأول هي لا تشرف نهائيا نادي الرجاء الرياضي ما كاينش انضباط ولا تعاون، كاينين انفلاتات كبيرة وكروبات، وحاولنا كمكتب مديري تجاوز هذه الصعوبات وندخلو اللاعبين فواحد الجو صحي، خصوصا وأنه كان عندنا ماتش دومي فينال كأس العرش، وقدرنا دغيا نخلقو مجموعة متجانسة واللي شد معنا الطريق راه شدها معنا، واللي مشى راه مشى".