الرجاء بداو كيوجدو النصر السعودي فقمة ربع نهائي كاس العرب

غيبداو الرجاء الرياضي يوجدو الماتش القاصح فربع نهائي كاس العرب ضد النصر السعودي، اللي غيتلعب الأحد الجاي بالسعودية.
وغيواصل الرجاء الرياضي التداريب بدون انقطاع، وخصص المدرب جوزيف زينباو حصة تدريبية اليوم الجمعة فالعشية للفريق، باش يبدا يوجد مع اللاعبين الماتش ضد كريستيانو رونالدو وصحابو.
ومن المنتظر يركز الألماني زينباور والطاقم التقني ديالو على تمارين لإزالة العياء من اللاعبين بعد ماتش البارح ضد الوحدة الإمارتي فدور المجموعات، والرفع من لافريشور فيزيك، بالإضافة لتحديد النهج التكتيكي اللي غيلعب به الفريق الاخضر ضد النصر.
وكيتنسى المدرب جوزيف زينباو وكاع الرجاويين يتكونفوكاو اللاعبين الجداد د الفريق من عند العصبة الوطنية لكرة القدم الاحترافية والاتحاد الدولي "الفيفا"، باش يقدر يستافد منهم الفريق ضد النصر، بعدما نجح مكتب الرئيس بودريقة فرفع المنع من الانتدابات على الخضرا وخلص أحكام النزاعات بمليار ونصف.
وكان الرجاء الرياضي تأهل إلى ربع نهائي كاس العرب بعدما تصدر المجموعة الرابعة برصيد 9 نقاط جمعها من 3 انتصارات، وغيلعب مع النصر السعودي اللي تأهل بزز كثاني المجموعة 3 برصيد 5 نقاط.