الوداد وجدو بعثة الفريق ووفرو لها الراحة والظروف باش تمشي تقاتل فجنوب إفريقيا وتجيب السوبر ليك وتفرح المغاربة

كتسهر إدارة الوداد الرياضي برئاسة سعيد الناصيري على توفير جميع سبل الراحة والظروف الجيدة للفريق خلال الرحلة ديالو إلى جنوب إفريقيا باش يلعب إياب فينال السوبر ليك الإفريقي.
وغتسافر بعثة الوداد الرياضي فطيارة خاصة، فرحلة مباشرة من مطار محمد الخامس بالدار البيضاء غدا الاربعاء إلى جنوب إفريقيا، ومن المنتظر يمتد وقت الرحلة من 10 الساعات حتى 12 ساعة ديال الطيران، والطيارة اللي غتدي الفريق مغربية بعدما تدخل الكاف واللجنة المنظمة للسوبر ليك وضغطو على السلطات الجنوب إفريقية باش تسمح بدخول طيارة لارام من بعدما كان غيكون اللجوء لطيارة أجنبية حيث جنوب إفريقيا ما مخلياش الطيارات المغربية تدخل الأجواء ديالها وتنزل عندها.
بعثة الوداد الرياضي المسافرة إلى جنوب إفريقيا غيترأسها مجيد البرماكي عضو المكتب المسير، وخصصت إدارة الوداد برئاسة سعيد الناصيري للبعثة فريق ديال الأمن الخاص غيمشي معها باش يحميها من أي حاجة ممكن تبرزطها.
وكذلك غيكون فالرحلة ديال الوداد إلى بريطوريا ديال الطبخ، حيث طباخ خاص هو اللي غيشرف على تجهيز الأكل للفريق الأحمر تماك، وراه الواك غيديو معهم ما يكلو ويشربو ملي يمشيو حتى يرجعو بحالهم للمغرب.
بعثة الوداد الرياضي إلى جنوب إفريقيا غيكونو فيها مكونات النادي فقط، وكلشي معول يمشي يتقاتل على لقب السوبر ليك الإفريقي ويجيبوه للمغرب ويكون الفريق الأحمر أول نادي كيربح هاد لاكوب.