كيف ديما: الناصيري غيموتيفي الوداد باش يتقاتلو فجنوب إفريقيا ويجيبو السوبر ليك ويفرحو المغاربة

كيواصل سعيد الناصيري رئيس الوداد الرياضي دعم ومساندة لاعبين الفريق، وغيتلقا معهم اليوم الاربعاء قبل ما يسافروا لجنوب إفريقيا يلعبو مع ماميلودي صن داونز الجنوب إفريقي ضمن إياب فينال السوبر ليك.
وغيدير سعيد الناصيري اليوم فالعشية زيارة للفريق قبل السفر هاد الليلة إلى جنوب إفريقيا، باش يموتيفي لاعبين الوداد ويشجعهم يتقاتلو فالفينال ضد صن داونز ويجيبو لاكوب من بريطوريا.
وغتسافر بعثة الوداد الرياضي فطيارة خاصة، فرحلة مباشرة من مطار محمد الخامس بالدار البيضاء فنص ليلة الأربعاء-الخميس إلى جنوب إفريقيا، ومن المنتظر يمتد وقت الرحلة من 10 الساعات حتى 12 ساعة ديال الطيران، والطيارة اللي غتدي الفريق مغربية بعدما تدخل الكاف واللجنة المنظمة للسوبر ليك وضغطو على السلطات الجنوب إفريقية باش تسمح بدخول طيارة لارام.
بعثة الوداد الرياضي المسافرة إلى جنوب إفريقيا غيترأسها عبد المجيد البرناكي عضو المكتب المسير، وغتنزل الطيارة فمطار جوهانسبرك وغتاخد البعثة الكار إلى بريطوريا اللي بعيدة بشي 60km، وراه إدارة الوداد برئاسة سعيد الناصيري خصصت للبعثة فريق ديال الأمن الخاص غيمشي معها باش يحميها من أي حاجة ممكن تبرزطها قبل وأثناء وبعد المباراة.
وكذلك غيكون فالرحلة ديال الوداد إلى بريطوريا، طباخ وفريق خاص ديال الكوزينة، هو اللي غيشرف على تجهيز الأكل للواك تماك، وراه غيديو معهم ما يكلو ويشربو اللي يقدهم ملي يمشيو لتماك حتى يرجعو بحالهم للمغرب. وبعثة الوداد الرياضي إلى جنوب افريقيا غيكونو فيها مكونات النادي فقط، وكلشي معول يمشي يتقاتل على لقب السوبر ليك الإفريقي ويجيبوه للمغرب ويكون الفريق الأحمر أول نادي كيربح هاد لاكوب.