الأولى والرياضية فرحانين بنسبة مشاهدة ماتش الأسود وتنزانيا.. واش هذا معيار لتقديمهم منتوج إعلامي مزيان ولا غير حيث محتكرين النقل؟

ولاو قنوات الشركة الوطنية للإذاعة والتلفزة، كيتسناو ماتشات المنتخب الوطني المغربي والبطولة الاحترافية اللي محتاكرينهم غير هما باش يفتاخرو بنسب المشاهدة، في ظل هروب المشاهد المغربي للقناة الثانية او القنوات الأجنبية والمنصات الإلكترونية باش يتفرج فبرامج رياضية بمحتوى مزيان او على الأقل متوسط.
الشركة الوطنية للإذاعة والتلفزة فرحانة اليوم بعدد المشاهدات اللي كانت فماتش المنتخب الوطني المغربي ومنتخب تنزانيا ضمن الجولة الثانية من إقصائيات كاس العالم 2026، وخا راه القناتين ديالها الأولى والرياضية هما فقط القناتين المغربيتين اللي عندهم حقوق بث الماتش، واللي وصلت عدد المشاهدات فيه إلى 7 ملايين.
هاد الفرحة ديال الشركة الوطنية للإذاعة والتلفزة المغربية، صاحبتها انتقادات كثيرة من المتابعين، اللي مدة هادي وهما مقلقين من طريقة معالجة الماتشات فقنوات الشركة إعلاميا، وخصوصا قناة الرياضية اللي ولات محتاكرة بث الماتشات بعدما حيداتهم لقناة m2، سوا ديال البطولة الاحترافية او كأس العرش وماتشات المنتخب المغربي، وكاين اللي كيشوف أن الشركة الوطنية للإذاعة والتلفزة خاصها تفرح إذا كانت نسبة المشاهدة مرتفعة فقنواتها وكاينة ومنافسة مع قنوات اخرى، ماشي البث عندها غير هي على الأولى والرياضية فقط.
الجماهير المغربية ولات كتشوف أن قناة الرياضية هي قناة ناقلة للماتشات وصافي، بلا برامج بلا مواكبات إعلامية، هي الأخيرة اللي ولات غير استثناءات وصافي، حيث عدد من الماتشات ديال الأندية الوطنية كتنقل بلا على قناة بلا برامج تحليلة وداكشي كيدوز مرور الكرام، وحتى ملي كيكون الاستوديو التحليلي فداكشي ولاو كيشوفوه بزاف ديال المغاربة باهت بزاف وديمودي سوا من ناحية الشكل او المضمون او الضيوف.