فضيحة فالعيون. والي الجهة كيفتاتح اوطيل ديال رئيس المجلس البلدي والرجل القوي بملايرو ولد الرشيد

لعيون السيمانا اللي فاتت عاشت فضيحة كبيرة. صورة كتلخص الوضع فهاد لمدينة. عبد السلام بيكرات والي جهة لعيون الساقية الحمرا كيدشن اوطيل فزنقة المرابطين قرب مقر الولاية بسوق الجاج. معاه حمدي ولد الرشيد رئيس المجلس البلدي لنفس المدينة.
صورة كانت تكون عندها جانب ايجابي كون ما عرفناش ان مول لوطيل هو حمدي ولد الرشيد. "ملك" لعيون ولى من اثرياءها من نهار خدا بلاصة خوه خليهن ولد الرشيد وولى متحكم ماشي غير فالمدينة بل الجهة ومدن اخرى فالصحرا.
من غير شوهة التدشين٬ كيفاش والي الجهة يقبل يدشن اوطيل باينة للعمى باللي كاين ترامي على الملك العام. شوفو انتوما ها صور هاد لوطيل. داير درجات فممر ديال الراجلين ومنزلو حتى الشارع. قدام لوطيل داخل فالملك العمومي وشوفو الصور.
هاد الشي زيد عليه باللي قسم الزنقة لجوج.
واش هاد الوالي ما شاف والو. ما بان ليه والو. واش حتى هو خايف من حمدي ولد الرشيد؟