الوداد فاقو ودارو حد للخسران برباح مهم على وجدة قربهم من صدارة البطولة

فاق الوداد الرياضي ودار حد للنتائج السلبية اللي تلقاها مؤخرا، برباح مهم على مولودية وجدة اليوم الاربعاء فتيران البشير، برسم مؤجل الدورة 7 من البطولة الاحترافية لكرة القدم.
وسالا الماتش بين الوداد الرياضي ومولودية وجدة بنتيجة 3 لواحد لمصلحة الوداديين، وتسنات الجماهير اللي تفرجت فالماتش الشوط الثاني باش تشوف الاهداف، حيث الشوط الاول سالا تعادل زيرو لزيرو، وكانو فيه غير 2 حمرات واحدة من جهة الوداد خداها هشام ايت برايم، ووحدة من جهة المولودية خداها عماد سربوت، وكانوا الوجديين هما الاولين اللي ماركاو فالمباراة، بواسطة يوسف أنور فالدقيقة 48، وبعدها قدرو الوداد يقلبو الماتش بتعادل ماركاه يحيى عطية الله فالدقيقة 62، وبعدها ماركا هشام بوسفيان الهدف الثاني للواك فالدقيقة 66، وبولي صامبو زاد الهدف الثالث فالدقيقة 79.
الرباح اللي حقق الوداد الرياضي اليوم مهم بزاف، حيث وضع به الفريق حد للخسران، ورفع به الرصيد ديالو إلى 16 نقطة وطلع للمركز الرابع مؤقتا على بعد 4 نقاط من الصدارة مع 2 ماتشات مؤجلين، أما بالنسبة لفريق مولودية وجدة فهاد الخسران زاد عقد وضعية الفريق اللي كيحتل المركز ما قبل الأخير برصيد 7 النقاط.