عادل رمزي: المهم هو الرباح وما شوغليش وقتاش ماركينا على سيمبا

اكد عادل رمزي مدرب الوداد الرياضي ان الفريق تحكم فالماتش ضد سيمبا التنزاني مساء السبت فتيران مراكش الكبير، واخا ما خلقش فرص كثيرة وان المهم هو الرباح.
وتحدث عادل رمزي بعدما ربحو الوداد سيمبا التنزاني برسم الجولة الثانية من دور مجموعات دوري أبطال افريقيا، وقال: "الشوط الأول تحكمنا فاللعب ولكن ما خلقناش فرص كثيرة وطلعنا الريتم بعدما كان نازل فالاول امكن بالضغط والعيا ولكن بعد 20 دقيقة بدينا كندخلو فالماتش وقربنا من مرمى الخصم وصنعنا فرصة وبعدها جات ضربة جزاء وفتوقيت مهم فالماتش حيث كان الضغط فالمباراة وكن ماركيناها كنا غنتحررو والتضييع ديالها زاد الضغط على الفريق".
وكمل عادل رمزي: "فالشوط الثاني درت تغييرات ولعبنا الكل للكل ولكن ما صنعناش فرص بزاف وسيمبا كانو كيتسناو ليكونطر اطاك، وكان خاصنا نكون رادين البال والحمد لله قدرنا نماركيو فاخر لحظة من الماتش، وبالنسبة ليا الرباح وال3 نقاط هي اللي مهمة، نماركيو فاول الماتش او فالدقيقة الاخيرة ماشي شغلي الكورة هي هادي وحنا كنا عازمين باش نديرو نتيجة ايجابية بالرغم من الضغط والعيا واخا هذا ماشي عذر وكنديرو واحد الريتم أنكروايابل والدراري كل 3 خاصهم يلعبو ماتش وهدا الشي تري ديفيسيل".