مؤتمر البام.. نايضا وسط قادة الحزب وقضية إسكوبار الصحراء حاضرة بقوة واللي تقدر تبعد أسماء عندهم مصالح مع الناصيري وبيوي من المكتب السياسي المقبل

بدات الحروب السياسية بين قادة الأصالة والمعاصرة، وذلك قبل أسابيع قليلة من المؤتمر الوطني الخامس للي غادي يكون 10/11 فبراير المقبل ببوزنيقة.
وكان أول أرنب سباق لهاد الحروب، صلاح الدين أبو الغالي، لي كلاشا الأمين العام الحالي عبد اللطيف وهبي، وصرح لعدد من وسائل الإعلام بلي وهبي ميصلحش يبقا أمين عام.
في المقابل وصف مقرب من وهبي الخرجة الإعلامية ل"أبو الغالي"، ب"الخوا الخاوي"، مؤكدا بلي بحال صلاح أبو الغالي مايمكنش يعطي دروس ولا يقدم نقد ذاتي للحزب وأن مسارو معروف وبلا ميحتاج نشرحوه ونفصلو فيه.
ويرى مصدر قيادي من تيار مراكش، بأن الخصومة بين أبو الغالي ووهبي تخدم مصلحة ترشيح كفة فاطمة الزهراء المنصوري، اللي غاتبان بلي هي مولات الحكمة والتوافق وتقدر تجمع بين أبو الغالي ووهبي وتصالحهم.
أبو الغالي خلى فتصريحو ل"كود''، كاع الاحتمالات حول ترشحو لمنصب الأمين العام. قال باللي ''كلشي ممكن''. للي حاسم فيه رئيس المجلس البلدي لمديونة فتصريحو ل"كود" هو موقفو من ولاية جديدة للأمين العام المنتهية ولايتو عبد اللطيف وهبي. فقد قال ل"كود" باللي ''ماشي راجل المرحلة نهائيا''. علاش؟ حسب أبو الغالي فتصريحو ل"كود" "وهبي اللي ديما كيهدر،٬ ضربها بسقلة. ما هدرش فالوقت اللي حزبو كيعيش زلزال. حسب أبو الغالي ل"كود'' فالأمين العام الحالي ما دافعش على الحزب. ما دافعش على مشروع الحزب. وباللي من حقو يترشح ولكن كقيادي هو كيعتابر الترشيح ضد مصلحة ''البام''.
دبا بقات أقل من شهر على المؤتمر الوطني الخامس لحزب الأصالة والمعاصرة لي غايكون أيام 9 و10 و11 فبراير 2024، ببوزنيقة، ومزال حتى واحد معارفش شكون لي غايجيه الوحي باش يزعم ويعلن راسو مرشح لقيادة هاد الحزب لي كان كيتوصف بحزب الدولة، حسب مصدر قيادي ل"گود''.
المرشح المحتمل لقيادة التراكتور مزال ممعروفش، حتى الأسماء لي باينا كتنافس بقوة على منصب الأمين العام بحال عبد اللطيف وهبي الأمين العام الحالي، وفاطمة الزهراء المنصوري، رئيسة المجلس الوطني للحزب، بجوجهم يمكن كيستناو الوحي باش يعلنو ترشح لهاد المنصب. البام تعرض لزلزال سياسي فقضية إسكوبار الصحراء، كولشي كيستنا كيفاش غادي يدوز المؤتمر وشكون السوبرمان لي غادي ينقذ صورة الحزب من محاولات ربطه بملف إسكوبار كيفما تم إنقاذ الحزب فمرحلة سابقة من محاولات السطو عليه من طرف أنصار إلياس العماري وحكيم بنشماس.
المؤتمر غادي يعرف مشاركة 3000 مؤتمرة ومؤتمر، أغلبهم من جهة مراكش لي معروفين بقوة التنظيم وحاضرين فالهياكل، عكس كازا لي فيها صراعات وكذلك الجهة الشرقية لي مشا ليها دينامو ديالها بيوي المتابع في ملف إسكوبار الصحراء بتهم تتعلق بالاتجار الدولي فالمخدرات.