اش واقع مع باريس؟ حتى للساعة ولا خبار على زيارة وزير خارجية فرانسا للمغرب ف"لاماب"

فشي شكل هاد الشي. وكالة المغرب العربي للانباء "لاماب" ما تسوقاتش لزيارة وزير خارجية فرانسا ستيفان سيجورني للمغرب. لحد الساعة ولا كلمة وحدة على الندوة الصحافية اللي دارها مع وزير الخارجية المغربي ناصر بوريطة.
فالصباح كانت الوكالة كتبات عن اهم مواعيد الاثنين "- السيد بوريطة يتباحث مع نظيره الفرنسي (صورة + فيديو".
ولكن بعد ساعات من ديك الندوة فالخارجية ما تكتب والو فوكالة الانباء المغربية الرسمية. هاد الوزير كان قال "أبرز نقطة في زيارتي إلى المغرب، ويجب على الرباط التعويل على باريس وموقفها الواضح إزاء دعم مبادرة الحكم الذاتي". واضاف ان موقف باريس واضح و"تسعى لحل النزاع وفق حل يرضي الطرفين"، واشار أن تحقيق التقدم فيما يخص نزاع الصحراء يقتضي تبني البرگماتية بمعية دعم المبعوث الشخصي، ستافان دي ميستورا، من أجل إسئناف المفاوضات.
واش هاد الموقف ما كانتش كافي للمغرب. ممكن. ولا غير تعطلو فالنشر. دابا الربعة وثلث دالعشية ووالو
باينة من اهمال اللقاء واهمال متابعة الندوة حتى لهاد الساعة٬ باللي يمكن الدولة المغربية ما عاجبهاش اش جاب هاد الوزير اللي كان حارب المغرب باش كان فالبرلمان الاوربي.
طريقة السلام ديال بوريطة معاه فالصباج كيف كيبان من هاد الصورة كتقدر توضح شي امور