بعد خرجة بايتاس التحقيرية لينا على قتل الجيش الجزائر لمغاربة. بوريطة صرط لسانو كيف عادتو وخارجية فرانسا فضحاتو: وزارتنا على اتصال مع سلطات المغرب والجزائر وعائلات الضحايا

تصورو من الندوة الصحافية للحكومة هاد السيمانا والموقف الغريب للناطق الرسمي باسمها مصطفى بايتاس ما خرج حتى شي حد فالحكومة على قتل البحرية الجزائرية للمغربيين بلال قيسي وعبد العالي مشوار فالبحر بعد ما كانو فالدجيت سكي وتلفو ودخلو للمياه الاقليمية.
بايطاس كان دار تصريح فالندوة الصحافية للمجلس الحكومي قال فيه باللي هادشي الجواب عليه من اختصاص السلطة القضائية. تصريح فيه تحقير للمغاربة لعائلات الضحايا. ما عزاهم ما تسوق ليهم. طبعا هاد الشي راه ماشي اختصاص القضاء. هاد الشي راه اختصاص الحكومة اولا. خاص موقف رسمي للمغرب. ما قدرش يدين قتل استهدف مغاربة.
لكن ماشي غير بايطاس اللي تعرض لانتقادات كبيرة من المعارضة لهاد الخرجة اللي بينات حجمو وضعفو السياسي٬ اللي كان ضعيف وبزاف٬ كاين وزير الخارجية والتعاون ناصر بوريطة. هاد لوزير اللي ما كيسكتش كيقيل يعطي التصريحات٬ ما شفناهش فهاد القضية.
وزارة الخارجية الفرنسية عراتو باش خرجات هادي يومين. باريس هدرات الجمعة اللي دازت على مقتل "فرنسي" واحتجاز اخر فالجزائر". بيان الخارجية الفرنسية قال باللي مركز الأزمات والدعم في وزارة الخارجية والشؤون الأوروبية وسفارتي فرنسا في المغرب والجزائر على تواصل وثيق مع عائلات مواطنينا التي نقدم لها دعمنا الكامل.
بوريطة سكت وفرانسا هدرات فموضوع حرك الرأي العام المغربي كولو. وزير الخارجية المغربي وفي لسياستو التواصلية. ايلى كان شي نصر مغربي فشي ملف ودارتو جهة اخرى بحال لادجيد او غيرها٬ كتلقاه فالواجهة٬ ولكن ايلى كان شي حدث مأساوي كيصرط لسانو. لحسن الحظ فرشاتو فرانسا لان من الضحايا كيحمل الجنسيتين المغربية والفرنسية