مالطا غادي تاخد اليوم رئاسة مجلس الأمن وها فوقاش غادي يتعلن على موعد جلسة المجلس حول الصحراء

Elouali.zaz.1987@gmail.com
غادي تاخذ دولة مالطا اليوم الاثنين الموافق لتاريخ 1 أبريل 2024، الرئاسة الشهرية ديال مجلس الأمن الدولي، وهو الشهر اللي غادي يكون فيه نزاع الصحراء حاضر.
ومن المنتظر أن دولة مالطا غادي تبدا تناقش مع أعضاء مجلس الأمن الدولي جدول الأعمال ديال شهر أبريل وشنو هوما الملفات اللي غادي يناقش، وهنا كيبرز نزاع الصحراء اللي غادي تم برمجة جلسة حوله بناء على مقتضيات قرار مجلس الأمن الدولي رقم 2703، واللي تم اعتمادو أكتوبر 2023، واللي ينص على أنه خاص تم إحاطة مجلس الأمن حول تطورات الملف وقتما شاف الأمين العام للأمم المتحدة أن ذلك واجب، او يتم إحاطة المجلس حول مستجدات النزاع فغضون 6 شهور، وبالتالي برمجة جلسة على الأقل فشهر أبريل.
مناقشات مالطا مع أعضاء مجلس الأمن غادي تبدا اليوم الاثنين، ولكن من المنتظر أنه يتم الإعلان عن جدول أعمال مجلس الأمن الرسمية يوم الأربعاء الجاي فندوة صحافية يعقدها السفير الممثل الدائم ديال مالطا أمام وسائل الإعلام، ويكشف فيها تواريخ جلسات المجلس وكل ملف إمتى غادي تكون الجلسة ديالو والمناقشات حولو.
هاد الجلسة غاد يقدم فيها المبعوث الشخصي للأمين العام للأمم المتحدة لنزاع الصحراء، ستافان دي ميستورا إحاطة حول الأحداث اللي وقعات من نهاية أكتوبر اللي فات وأهم المحطات اللي دازت منها القضية، وكذلك جهودو وشنو دار فهاد الفترة ديال ست شهور ومع من تلاقى وشنو هي تصورات أصحاب المصلحة.
وبالإضافة للإحاطة ديال دي ميستورا، غادي يقدم رئيس بعثة "مينورسو" الروسي ألكسندر إيفانكو إحاطة حتى هو لأعضاء مجلس الأمن باش يقوليهم شنو دارت بعثة الأمم المتحدة "مينورسو" وشنو هوما الإكراهات اللي كتواجهها وشنو العراقيل المطروحة وأهميتها باش توفر جو ملائم للدفع بالعملية السياسية ديال الملف وحفظ أمن واستقرار المنطقة.