زهور باقي في اول مقالاتها مع "كود": ماشي كتب السعداوي وانگلز واركون وكاماسوترا اللي اثرو في فحياتي وخفت نقولها ليكم تسميوني عاهرة

بزاف ديال الناس تحداوني فهاد التحدي ديال الكتوبة ...وأنا فرحانة بزاف بكل جدية حيث شي وحدين ماكنتش متوقعاهم وكتبو سميتي وماهذا إلا اعتراف من طرفهم وشرف أنك واحد " الساطة مثقفة ودوك اللعيبات" واخا مكنهدروش بزاف كيتحداك فاسبوكيا أمام الملأ فهذا دليل على أنه متبعك وعارفك ترقى لمستوى التحدي ..حيث راه مكانتحداوش أي واحد

ماعلينا ماشي هذا هو المهم كاع...وماجاوبتش على هاد التحديات ماشي حيث قلة الأدب مني وتعجرف وانتقاص من المبادرة ( الي فعلا صالحة للطنز) لأنه " بالطنز وحده يمكن أن يعيش الإنسان كريما فوق هذه الرقعة الجغرافية" ولكن حيث وحق سيدي ربي ما أثر فيا شي كتاب ... الكتوب اللي كنقرا كيعجبوني نقدر نجيب " البليزير" ديالي معاهم، كيعوضوني على العزوبية وكل واحد وطريقتو في الاكتفاء الذاتي وما ديروهاش مني قلة الصواب ..."لا حياء في العلم" ... مكاينش شي كتاب غيرلي حياتي وحسيت أن حياتي تغيرت من بعد ما سديتو، كاين كتوب كيعجبوك، كاين كتوب كتستافد منهم بزاف وكاين كتوب كيمرضوك مكتكملش فيهم الصفحة " الكتوب طوب وحجر" ....

أنا اللي كنقول ميمكنش كتاب يأثر فيا في حياتي فعلا... اللي أثر في حياتي وغير أفكاري هي الحياة هي الاحتكاك مع الناس هو التجارب في الحياة...الواقع حاجة والكتوبة حاجة أخرى كتلتقي بيه أحيانا قليلة وكتتفارق معاه أحايين كثيرة...

راه ماعمر كتب نوال السعداوي وسيمون دي بوفوار بدلولي حياتي وخلاني نحس بالمرأة ومعاناتها والحكرة اللي عايشها في الحياة داكشي يطير تا السما وينزل كيبقا غا تنظير اللي أثر فيا هي ملي خرجت من دارنا في سن صغيرة و وكتاشفت أني امرأة وتعايشت مع هاد المجتمع الذكوري الذئب اللي كلها وفين كيجبد، كلها وفين باغي ينهشك، نفسيا وجسديا ومعنويا وماديا أحيانا...حسيت بالمرأة في الشارع، في مقابلات العمل، في امتحانات الشفوي في لافاك عاد حسيت بشناهو التحرش، وشناهو السيكسيزم، "السيكسيزم" مصطلح خذيت تعريفو من الواقع ماشي من شي كتاب.
راه ما عمر كتب أركون ولا باكونين، ولا داوكينز ولا القصيمي ولا ساغان ولا غيرهم خلاوني نعيد نظرتي للأديان بشكل عام باش منقولكش الإسلام... ولكن راه القران وتاريخ تعاقب الأديان هو نيت اللي خلاني نعيد التفكير والتجارب والممارسات والتطبيق ديالو والتناقضات اللي كتبان ليك ميمكنش عقل واعي يتقبلها ولا يفهمها وهادشي كيتأكد ليك من رمضان لرمضان.

راه ماشي كتب ماركس وإنجيلز وروسو اللي خلاوني نفكر في التقسيم العادل للثروات والعدالة الاجتماعية و"أين الثروة؟" وفي الظلم والحكرة في المغرب راه الزهر اللي كيخليك تعيش في دولة كتوفرليك كاع هادشي ( الحلم المغربي) بلا متقرا لا حرف لا جوج والواقع هو اللي كيأثر عليك وكتعرف أنه حقك كيسرقوهليك ناس اخرين وكتبقا تطالب به وتخرج للشارع واللي تلاقيتيه تسولو " فيناهو حقي" وتغني " واش نتا مسطي تاكل ليا رزقي"...

راه ماشي شعر نزار القباني ولا داكشي ديال احلام مستغانمي اللي خلاني واثر عليا في مفاهيمي للحب ولكن راه تجربتي في الحب اللي خلاتني نفهم شنو هو الحب ديال بصاح وعلاقته بالجنس وعلاقتو بالواقع وعلاقتو بالمجتمع وعلاقتو بالعذرية، وعلاقتو بالعائلة والجيران وعلاقتو بالفلوس وعلاقتو ب"جيب معاك جوج خبزات" بعيدا عن الطوباوية ديال أحلام وقصص ألف ليلة وليلة وأشعار امرؤ القيس وشعر المعلقات راه الحب ممارسة ماشي تنظير وهادشي مكيتفهمش من الصفحات.

راه الحياة اللي علمتني راه العصامية اللي علمتني وراه الاعتماد على النفس اللي علمني واثر فيا ... أثرت فيا " القامرة" وأثر فيا " الحي الجامعي" وأثر فيا " أكدال" وكاع المراحل الانتقالية الي دزت منها هي اللي أثرت فيا وعليا مكاين لا كتاب لا جوج...أثرت فيا العلاقات الإنسانية والتجارب ديال المقربين وحتى اللي بعاد...

راه حتى الصحافة 4 سنين وأنا نقرا فيها ملي خرجت للواقع راه " التيران" و"القرى" والمداشر" والفنادق الفاخمة" و"البيران" و"اللوكس" و"القهرة" راه التقائك وارتقائك اليومي في السلم من العساس حتى للوزير اللي أثرت فيا وعلمتني شناهي الصحافة وشناهو توقيع الصفقات فوق كاس ديال الشمباني وتجيب السكوبات من بعد متخلص على شي حقير في شي بار حقير في ظروف حقيرة ..كتب الصحافة والتحقيقات والأجناس الصحفية كتعلمك كيفاش تكتب الخبر ولكن كيفاش تجيب الخبر مكتوريكش يا إما تكون " نزق وحال دماغك وعينيك، أو حال جيبك، أو حال رجليك" هادشي مكيتقراش في الكتب عليها أنا عمري جبت شي سكوب.

الواقع والحياة مختبر كبير وكتاب مفتوح ومنهل علمي وفلسفي وأدبي مجاني للجميع يقدر يستافد منو كولشي ما أمكن... والكتب ما هي إلا مراة كتعكس أو كتفنذ داكشي اللي تعلمتي وكتوضعك في الطريق الصحيح

وأهم حاجة راه معمر كتب التنمية الذاتية غادي يأثرو فيك ولا داكشي ديال " إبراهيم الفقي " وما جاوره اللي كان عايش في كندا وينظر من برجه العالي " واذكروا أمواتكم بخير" اللي غادي يغير ليك الواقع ديالك ويعيشك في الأحلام .
وإذا كنتي كتتخيل أن كتاب من طينة " كيف ستنجح في 6 أيام و4 ساعات ونصف" وبدون معلم غادي تخليك ناجح فراه والله وماشمرتي على كتافك وجبتي رزقك لا طفرتيه وداكشي كينبع منك نتا من شي بلاصة لداخل معرفتش فين جات هي اللي كتسيرك وكتقوليك نوض "نمي ذاتك وطور مهاراتك"... يمكن النقطة G ديال "الحكرة"

حشمت نقوليكم راه " ماشي الكتب ديال " كاماستورا" اللي غادي تعلمكم كيفاش تمارسو الجنس وتطبقو وضعايتو وإنما التجربة والممارسة وما ينبع منك نتا في إحساسك ورغباتك والفانتازمات ديالك... خفت نقوليكم هاد الهدرة تسميوني " عاهرة" سير على الله أنا عاهرة عاهرة من منظور شي طبقة منكم إلى أن تتبث براءتي واخا ندير الحجاب والنقاب ونجود ستين حزب...
رابط صفحتها على الفايسبوك
رابط ثان لصفحتها