مذكرات سقراط في السجن تنفرد بنشرها "كود" الحلقة 13. نهار جرى سجين على رئيس المعقل وحقق مطالبو وها اللي كان على صحاب عشرين فبراير يديروه باش يجريو على البوليس

يوم الإثنين ليس كغيره من الأيام فالحبس, صحابي الرباطيين مكيحملوهش واخا كتبانليا أنا حياتهم كلها نهار التنين , حتى فالحد كيكونو بحال نهار الأثنين ,فمراكش مثلا الأسبوع كلو ويكاند, فطنجة كاين نهار الجمعة العام كامل , فالحبس كان نهار الإثنين زاخر, حيث من بعد يوماين ديال الزامطة كيجي نهار الإتنين بحال العيد, كتكون الزيارة خدامة والخير كيدخل معاها, العياطة فالكروة محركين , الموظفين الكارد شامبريات , والشيفان, كولشي محرك ومدور الصرف, والرواج .
خرجت حتى أنا نتسركل , دابا صافي بديت كنولف وكندمج , وكونت علاقات , يعني معامن نجمع , معامن ندور الهدرة, معامن نتسركل , و كانت ديك جوج ساعات ونص ديال الفسحة كتدوز دغية, ملاهي مع صحاب الزيارة, وصحاب المحكمة , كاع لي راجع كتسولوا نفس السؤال لي سولوه عرام قبلك : آش دارو معاك أعشيري , و كيكون الجواب احدى الكلمتية : اما مدة الحكم أو مداولة .
بقيت كنتسركل حتى فواحد المشهد فجائي كيبانليا رئيس المعقل هربان كيجري , أواه رئيس المعقل بعظمته وجلاله هربان ,إذن تابعوا شي واحد بشي كالاش , حتى بانليا واحد طالي نصف الجسد ديالو بالخرا, بما فيه وجهه, وجاري من ورا رئيس المعقل باغي يتعانق معاه, والموظفين تابعينوا وماقادرينش يشدوه ,حتى جاو شي وحدين بالكواش وبقاو كيلوحوهم عليه حتى غطاوه, عاد كمشوا فيه, ولكن مشدوه حتى كان الحبس كلوا كيضحك , أنا ضحكت بالدموع وسولت على خونا شكون, قالوليا هاداك مصطفى مجيريبة, رباطي عايش فمراكش, مخلاش حبس مدوزوش, جاي لشي تلاتين علم ديال الحبس مقطعة ,راه دوز مع الحاج تابت فعين برجة, ومسخووط الواليدين هادا حباس حقيقي , عمري تخايلت أنني غادي نشوف شي طريقة ديال الإحتجاج بهاد القذارة, ولكن بفعالية , وأداة المطلوب منها ,ووصلات الميساج, بل وخلات هاداك لي كيمثل السلطة هربان ومخلوع وخايف ليتوسخ بالخرا . وبقيت كنقول مع راسي كان على عشرين فبراير يجمعوهم يدوزوا الحبس هو اللول عاد يخرجوا يديرو الثورة, وتخايلتهم مطليين بالخرا وجاريين على البوليس والسيمي والمخزانية , هاد الأخيرين هربانين خيفانين لا يتطلاو بالخرا , و تخايلت المعطلين بنفس الصورة , وجاريين على البوليس قدام البرلمان, والريحة عاطية من باب الحد . كان غادي يكون مشهد عفن, لكن معبر ومجدي وفعاليته غادي تكون فالمتوقع, حيث كما أن مجيريبة تمت تلبية مطالبه الشرعية, ونتاصر في حربه ضد القمع, فربما يمكن كون نهجات حركة عشرين فبراير نفس الطريقة ديال الإحتجاج, تقدر تكون وصلات لملكية برلمانية ودستور شعبي ديمقراطي, واخا غادي يجي هادشي بريحة لخرا هانية.