واهيا لمعفر عفر بشوية: الشيخة ماشي واللي كيشك يقرا تاريخ الشيخة وعلى سبب التسمية و على مكانتها في المجتمع من مساسينيسا حتى اليوم

كاين بعض لمغاربة كيهضرو بالفرونسي اكثر من العربية باش يبانو كلاس و ماعارفينش ان الهضرة بالفرونسي مع عرب فحالك فحالهم راه استعمار ثقافي ، خاصنا نفهمو كلمة كلاس بمفهومها الصحيح راه عمرك ماغادي تبان كلاس ايلا كليتي الرفيسة بالموس والفورشيط والمرقة بالمعلقة ومشيتي للمطعم و قلتي سيلڤوبلي عطيني هربل اوفخوي دميغ ولا اعطيني كسكسو گغاتيني … واش ايلا كليت السوشي وانا مشهية التقلية باللوبيا غادي نبان كلاس؟؟ ينعل بو هاد لكلاس والناس اللي كيلعبو فيها لعياقة … في راسكوم راه كاين بزاف الناس الفغونسي و الفيلا ولابيسين والشيفور وكيدوقو هربل كيقولو وااااو سي ديليسووو وكياكلو البيتزا كيفما كاتكال في ايطاليا باليد ماشي بالموس و الفورشيط أعباد الله .
وهادشي كامل غير باش نقول للناس اللي باغين الغنا الشعبي بالفغونسي باش يشطحو عليه الريگيطون و المرينگي والتانگو ويبانو واعرين وعاوتاني كلاااااس ، هنا غادي نقوليكم الله ينعل اللي مايحشم و الله يعز اللي كيفتاخر بمغربيتو وكيعرگها كسكسو ويتبعو كاس اللبن نهار الجمعة و يتأنتخ فوق السداري
عجبني هاد الدري اللي سميتو عثمان اللي كيغني الشعبي تماما كيفما كيعجبني حجيب و الحاجة الحمداوية ملكة العيوط والبندير والصنهاجي والستاتي و اللائحة طويلة ديال المغنيين اللي تايغنيو الشعبي في المغرب وكاتعجبني التسونامي بالشطيح والغنا وباغا نشوفهم لايف و تكون قصارة فاعلة تاركة نحيدو فيها الطالونات و العياقة و ندردكو ونركزو وحك جر تايصبح الصباح و تانموت على العونيات والحال ما يشاور .
وعجبني عثمان بالقراية واللوحة والستيلو نعام اسي لاني مع الفنان القاري الفاهم المثقف والواعي لسبب واحد ان القراية والمطالعة عمرها ما كتحد الموهبة بالعكس كتخلينا نوصلو و نفهمو تاريخ الفن وفكر المجتمع اللي تانعيشو فيه .
برافو على عثمان و نقوليك اخويا كاين اللي كينتاقد كاين اللي تايشكر كمل في طريقك احنا محتاجين لثورة فنية و ثورة فكرية يقودها الفنانون المثقفون اللي عندهم كلمة مسموعة و محبوبين باش ينشرو فكر فني زوين و يعرفو الناس بتاريخ و بجمال الفلكلور المغربي ويبعدونا على الفكر الارهابي اللي جاي من هك ومن هك .
اما بالنسبة للناس اللي عندهم عقدة من الشعبي و عجبهم عثمان غير حيت مستيلي نقوليهم راه المرض في عقولكم ماشي في الشعبي باراكا من الغباء و التصنع والله يعز تامغرابيت بكل حذافرها والناس اللي كيعتبرو كلمة الشيخة معيارة و كاياخدو اللفظ بمعنى قدحي نبغي نقوليهم قراو على تاريخ الشيخة وعلى سبب التسمية و على مكانة الشيخة في المجتمع المغربي وعند الامازيغ في عهد ماسينيسا وما قبل ( اللي ماكيعرفش ماسينيسا وهادشي اللي قلت يسول عمنا جوجل على المعلومات باش يفهم بدل مايبقى يسول غير على مواقع الجنس ) اييييه نعام اسي عاد هضرو على تشياخت غير جي وكون شيخة الله يعز الفنون و العيطة والجرة و الشعب المغربي اللي عندو في الختانة هدية و في الزواج دفوع و قصارة و في النجاح زردة …. وحتى في الموت تلتيام ديال الزردة و التفاريق حفلة ختامية للمرحوم وايلا مات عزري يخرج بالزغاريد الله يعز المغاربة الشعب اللي عندو الفرح والكرم في الدم
رسائلي للكبار فهما لا الكبار سنا
الله يجيب اللي يفهمنا ولا يعطيناش