حصاد من عافية الداخلية لاحوه مسكين لجهنم التعليم. توقع باش يتعين فالتعليم

حسب "ايلاف المغرب" محمد حصاد وزير الداخلية غادي يمشي للتربية والتعليم باش يخلف رشيد بلمختار. السيد عندو تجارب كبيرة ومن كبار الاطر فالمغرب. كان فالتجهيز ودوز والي مراكش وطنجة ودار الموانئ وبعدها الخطوط الملكية المغربية وميناء طنجة المتوسط عاد حط الرحال فالداخلية.
تعيينو فالداخلية جاب ليه مشاكل كبيرة لطبيعة هاد الوزارة اللي خدا فيها بلاصة محاند العنصر بعد ان جربت الدولة استوزار حزبي وما صدقش هاد الشي. هاد الشي غادي يخلي مستبعد يتعين محمد بوسعيد فالداخلية واخبار تتحدث عن تعيينه في السياحة
حصاد تلاح للعافية حقاش وزارة التعليم اخطر من الداخلية. مشاكلها كبيرة ما عندها حل والتعليم غادي من اللاور للاور. حصاد تقنوقراط ولكن هاد الوزارة كما ما راج حتى حزب ما بغاها حقاش عارفين مشاكلها.
يبدو ان الشرقي الضريس هو اللي غادي يعوض حصاد وممكن يجيبو ليه شي وزير منتدب. كانت اخبار عن تعيين عبد اللطيف الحموشي وزيرا للداخلية غير هو صعيب بالنظر للمهام الحساسة والملفات لكبيرة اللي عندو وهو مدير للمخابرات ومدير للمديرية العامة للامن الوطني وفيهم بجوج خدام وعندو اوراش كثيرة مفتوحة بالاضافة الى الملفات الامنية الكبرى فالمغرب وفي مقدمتها الارهاب.
فالخارجية ناصر بوريطة غادي يقود هاد الوزارة رسميا بعد ما كان كيقودها وهو وزير منتدب.