إلى أسماء لمنور وحاتم عمور: عندنا الزين عندنا لحمام عندنا اسما

حديث الصحافة هاد الأيام على داكشي اللي دار حاتم عمور في موازين أولا ماقبلش يفتتح الحفل وحط الإدارة في موقف لا يحسد عليه حيت طلب منهم في آخر لحظة يجيبو فنانة أقل صدى تفتاتح الحفل حيث هو تايشوف أنه في نفس مستوى نجومية أسماء المنور و لكن في التصريح ديالو بالفيديو للصحافة زاد الطين بلة ملي قال: (لا ماشي السبب أسماء هي أختي وعلى راسي و لكن السبب أن الوقت غير مناسب باش نطلع بغيت حتى يتجمع الجمهور مع الحداش عاد نطلع ) بهاد المقولة فكرني غير في اللايفات ديال فايسبوك اللي تايدخلوها ناس وتايبقاو مسطحين لينا وجهوم و ساكتين وتايقولو تايتجمعو الناس عاد نهضر …
هنا بغيت نقوليك أسي حاتم عمور لوكان عندك ثقة في نفسك وثقة في جمهورك وخا تكون غادي تغني مع السروية غادي تلقى جمهورك فايق بكري بحالا غادي يغطس على اللميعة وجاي وكايتسنى باش يشوفك لأن الفانز هو اللي تايطيح على الفنان ديالو في العافية شوف مثلا سعد لمجرد أو تامر حسني وخا يديرو حفلة مع ساعة آذان المغرب في رمضان غادي تلقى الجمهور جايب التمر و الشباكية في ميكة وكايحلل صيامو وهو يهتف بإسم نجمه المفضل …
هنا فين تانقولو وكون سبع وكولني …
أسماء لمنور طبعا خاصك تقول عليها أجمل كلام لأن فاش كنتي باقي موهبة تتمنى الصعود هي كانت نجمة وحضرات باش ترفع مشاهدات المواهب الجديدة أنا ماغاديش ندافع على أسماء ولا غادي نسرد تاريخها لأنه معروف من نهار طلعات وهي منوضة الأرارة للفنانين العرب قبل المغاربة معروفة بالنجاحات والصوت والذكاء و الديبلوماسية في التعامل ومن حقها تكون عندها منصة بوحدها في المهرجان …
أنا ماشي تانقلل منك كفنان بالعكس تانهضر بالعقل والمنطق وتانحاول نقوليك رد بالك من فحال هاد الزلقات وتانقوليك نصيحة احتارم جمهورك لأنك درتي داكشي اللي في راسك و طلعتي معطل للمسرح دون أدنى احترام للجمهور اللي واقف تايتسناك أو اللي مضطر يجي بكري و يشوفك باش يشد بلاصة حيت تايتسنى صعود أسماء لمنور للمنصة …
يا أخي الفنان اللي واثق من نفسو ماتيقولش نتسنى تايتجمع الجمهور وكيفما تانقولو في المثل المغربي ( اللي يبغا يبوسك تايعرف فمك في الضلمة ) ..
هادشي اللي وقع فكرني في واحد الموقف طحت فيه في مهرجان مع المنظمة نفسها معيطة عليا وندمات واقيلا ملي شافت التلاميذ أشنو دارو عليا في الدرس قبل مانرقص في الحفل و غيرات ليا البروجرام قالت ليا انتي اللي غادي تشطحي في الأول مع ان كاين نجوم اصغر مني فنيا وكان خاصني نكون في الآخر قلت ليها وخا ماعنديش مشكل أنا نفتاتح وخا ضيق الوقت باش نجهز راسي عرفتها بغات تحشيها ليا خصوصا أن كل الفنانين عارفين باش تبدا أنت الاول وتحمس الجمهور و تخليه يتفاعل معاك من أصعب مايكون المهم أنا ماعنديش مشكل كيفما تايقول المثل المصري ( الشاطرة تغزل برجل حمار ) بدلت الموسيقى ودرت إيقاعات صخبة ودخلت نشطح حيحت مع الجمهور خليت كلشي تايصفق ونوضتها بالمعنى المغربي (نايضة ) و خرجت جلست تاتنتفرج اللي خارجة تشطح على كلثوميات و اللي دايرا شي ديسك ناعس الجمهور أنا فيقتو و حمستو وهوما نعسوه .. المهم ملي سالا المهرجان الجمهور اللي هو من التلميذات وأساتذة الرقص كلهم بقاو تايقولو أحسن شو ديال حكيمة وانا بقيت تانشوف في منظمة المهرجان بابتسامة ساخرة ديال (تحشات ليك أزين ) الضربة اللي كنتي جايباها ليا رديتها ليك بنفس القوة باش كانت جاية هههه وهذا هو الذكاء الفني لان الفن ماتيحتاجش غير الموهبةأو التقنية خاص الكاريزما والذكاء و احترام المواعيد والجمهور والديبلوماسية في هاد المواقف وهادشي كامل أنت غلطتي فيه اسي حاتم عمور ودابا شوف تشوف واش إدارة موازين يعاودو يعيطو ليك بعدما تعامتلي بهاد الإستهتار ونتمنى تكون ستافدتي من التجربة وقتانعتي أن اسماء المنور كبيرة وبزااااف …
وعندنا الزين عندنا الحمام … عندنا أسماء لمنور
رسائلي للكبار فهما لا الكبار سنا .
الله يجيب اللي يفهمنا ولا يعطيناش