تقدر تكون سياسة النخال لي خدامة بيها الحكومة سنوات هادي خدامة وناجعة ولكن شحال هادي ، أما دابا النخال كيزيد غير يأجج الوضع وهادشي لي وقع فالريف وكيعاود يوقع فجرادة

، حقا بعد المرات كتكون طلبات المحتجين مبالغ فيها أو كتشد الوقت فالإنجاز ديالها ومستحيل تكون إستجابة فورية والتنمية كتطلب سنوات من العمل وتظافر الجهود ، ولكن مع ذلك هاد الصمت واللامبالات ديال الحكومة وباقي المنتخبين راه کيزيد يشعلها وكيبين لبلاد على أنها فيها انتقاضات شعبية ، بينما فالواقع البلاد فيها احتجاجات بمطالب اجتماعية معندها حتى شي بعد سياسي، المغاربة باغين يعيشو بيخير ويذوقو حتى هوما الحلوة لي محتاكرينها غير شي وحدين (مكنعرفهمش).
ولحد الآن حراك جرادة غادي وكيتأجج والحكومة والمنتخبين والا فبالهم ، بحال الى الأمر مكيستهدفهمش كمسؤولين وكحكومة ممثلة للدولة ، وإنما كيستهدف شي دولة خرى ، راه هاد الصمت وهاد الجمود هو لي كيزيد يقودها على الوقت فهاد البلاد ، لاش صالحة هاد الحكومة وهاد المنتخبين وهاد الأحزاب السياسية وهاد جمعيات المجتمع المدني إلى مكانتش تطير لعين المكان وتلقى حل لأي إحتجاج فهاد البلاد ، واش الإرادة الشعبية صالحة غير كدروج للمنصب والسلطة ، أما ملي كتولي تعبر هاد الإرادة الشعبية على راسها وباغا حقها ، كتلقى غير الصمت المطبق والنخال من طرف المنتخبين والحكومة.
العملية الديمقراطية بصيغتها الحالية كل مرة كتبين الفشل ديالها فالمغرب ، الملايير كيتخسرو على الاحزاب وعلى الإنتخايات وعى المنتخبين وعلى المجلس التشريعي وعلى جمعيات المجتمع المدني ، بزاف ديال الفلوس كتصرف ولكن بلا حتى شي فائدة ، وملي حقا كيتحتاجو هاد الهيئات والأجهزة مكنلقاوهمش ، فين هو دور المجتمع المدني والملايير ديال جمعيات الدعم علاش مكاينة فحتى شي احتجاج كطرف محاور ومؤطر ، كذلك الحكومة والمنتخبين المحليين ، كتبقى الأمور هاكاك غادا كولشي كيتسنى شي قرار من السما أو أمر الهي باش يتحرك ، والنتيجة كتكون هي أبناء هاد الوطن كيتشايرو بالحجر بيناتهم .