ماكاينش فرق بين الارهابي لي كايدعي لقتل و الانتقام من الشوبي و الحجر عليه و داك الارهابي لي رتاكب مجزرة شارلي ايبدو ! غير واحد زعم و عفط و لاخر مازال مازعم يدير شرع يديه

الاسلاميين القوالبية دايرين حملة هاد الأيام ضد الممثل الشوبي !
و حيت قوالبية ! و خايفين من الخيام لايقرقب عليهم ! كايهددو الشوبي غير بالفن ! واحد كاتب ليهم فالفايسبوك ما معناه ” انه الدولة لامادخلاتش و شدات الشوبي فالحبس و كرفصاتو و مرمداتو عقابا ليه على شنو قال راه ديك الساعة ماتلوم الا راسها لاجا شي ” معتوه” و دار فيه شرع يديه!
واحد آخر مسمي راسو مول الفوقية مبارطاجي منشور طويل عريض، فيه بلي لي كايسب الأنبياء مثل آدم كافر يجب قتله و لا تجوز توبته ! و مساليها ب يجب على الدولة محاكمته ! ههههه ! زعما راه هوا شخصيا ماقال والو ! او بالاحرى گااااال و لكن باش يگول ختار يتخبى مورا ” رواه البخاري” و قال ابو هريرة و عن خليل عن الخرشي … و شي أسماء كايضرگو موراها باش ينشرو الكراهية و الظلامية و يعطيو تبريرات للقتل و العنف.
توما علامن كاتقولبو ؟
جيونا نيشان الله يخليكم و قولو لينا شنو بغيتو بالضبط !
شنو بغيتو ؟ نقتلو الشوبي ؟ نجلدوه ؟ نملخوه عصا ؟ شنو بغيتو الدولة دير باش تبرد ليكم فيه القلب ؟ بغيتوها تشدو فالحبس يغمل فيه !؟ باش تبردو !؟
لا جيونا نيشان الله يرحم الواليدين و قولو شنو بغيتو بلا ماتخباو مورا ديك قال و قال و فاللخر تكتبو ” نحن لا ندعوا الى العنف” و الارهاب لا يمثل الاسلام ….” خليوني من التناقضات.
اولا لحد الساعة الشوبي ناكر بلي قال داكشي لي فداك الفيديو بديك الطريقة ! و كايقول بلي تم تغيير الفيديو فالمونطاج باش يبان قال بلي النبي آدم ” سلگوط” ! ياك نتوما أول واحد خرج كايغوت ” هاا ناري الدولة فبركات الفيديوات ديال بوعشرين ” ” ها ويلي مايمكنش بوعشرين يدير هادشي اكيد الفيديوات تم اللعب فيهم ” ! دابا صافي مابقيتوش كاتيقو بالمونطاج و داكشي ديال الفبركة ؟ دابا صافي غا بان الفيديو غاطبقو المثل القائل طاحت البگرة كثرو الجناوا ؟ و لا هاداك بوعشرين غادين معاه بسياسة انصر اخاك ظالما او مظلوما و هذا الشوبي الشعكاكة ديالو ماعجباتكمش !
ثانيا لنفرض مثلا مثلا يعني إني آبلتك يوم ! الممثل الشوبي وصف النبي “آدم” بداك الوصف لي فالفيديو ! واش فنظركم صافي خاصو يتقتل ؟ خاصو يتجلد ؟ خاص الدولة تشدو فالحبس ؟
ماكايناش شي حاجة سميتها الرأي و الرأي الآخر ؟ راه كيما الدولة فيها ناس متدينين ، فيها ناس غير متدينين ، و الدولة الحقيقية هي لي كاتضمن ليهم بجوج يعيشو و يعبرو على آراءهم بالشكل لي بغاو و ينتاقدو و يستهزؤو من شنو مابغاو … حيت الحرية لا تتجزأ ! يا عند حرية يا ماعندكش ! ماكايناش ديك القضية ديال الحرية ” فيما يرضي الله” و الحرية ” مع مراعاة مشاعر الأغلبية ” … الحرية غير كاتزيد تكتب حداها شي حاجة ماكاتبقاش حرية كاتولي خرية !
نورمالمو ! و هنا كانهضر على الدول التي تحترم الانسان ! حرية التعبير خاص يكفلها القانون لجميع المواطنين.
ايه كايبقا الدين واحد الحاجة من الحوايج الصعاب لي يمكن تنتاقدهم خصوصا فمجتمع فحال ديالنا على الاقل فالعلن ( حيت فالخفاء الكونتيتي ديال النكت لي كاتبدا بگالك هذا جبريل و گالك هذا واحد مات و طلع للجنة و گالك هذا واحد واقف كايصلي ….راه فايتين سكان قطر) و لكن فالعلن الدين كايولي قنبلة موقوتة لا نويتي تضحك على شي حاجة فيه و لا تنتاقد شي حاجة فيه ! و لكن هاد المسألة راه ماخاصهاش تكون حيت الطبيعي هوا الحرية ! الاصل هوا الحرية ! و كل واحد خاص تكون عندو الحرية يعبر كيفما بغا متدين او غير متدين.
المشكلة هنا أنه ! الاسلاميين ” القوالبية” حيت قوالبية ماكايبغيوش حرية التعبير ! كايكونو ضدها ” فاش كاتجرح ليهم المحاسيس” و كايوليو معاها فاش كاتكون غاتخدم الأجندات ديالهم الايديولوجية و السياسية ! الاسلامي كايفرح فاش كايشوف خوتو الخرزيين واقفين فشي شارع فبرلين و لا لندن بلحاياهم بزيوفاتهم كايغوتو ” بغينا نطبقو الشريعة الاسلامية” فقلب عواصم اوروبا و كاتعجبهم حرية التعبير لي فاوروبا و كايحلو دلاقشهم و كايستحلاااوها و لكن غير كاتجي نتا آ بعرور و تبغي تاخد ليهم شوية ديال حرية التعبير و تمارسها تانتا كاينوضو يتنابحو عليك كي الكلاب” شدوه شدوه شدوه ! قتلوه ! ضربوه! حاكموه …”
راه آنورمال أنك تطالب بمحاكمة حيت حد حيت انتقد شخص نتا عزيز عليك !
خاصكم تعلمو شوية تكبرو عقلكم و تقبلو النقد و الاستهزاء گاع حيت ماتراه مقدسا يمكن واحد آخر ماكايشوفوش مقدس !
و فحال هاد الأفكار لي عندكم و لي كاتواجه الاختلاف بالدم و العنف هي عطات مجزرة شارلي ايبدو ففرانسا و مجزرة فان كوخ فهولاندا …
هادوك المجرمين راه هوما نتوما
عندهم افكاركم
و نفس الخلفيات ديالكم…
غير هوما عفطو و نتوما مازال ماعفطوش …