كلشي كايتسنا هاد الكتاب الجديد على ترامب و هادي مقتطفات منه

حصلات الواشنطن بوست على نسخة من كتاب بوب وودوارد اللي دارو على الرئيس الامريكي ترامب، ونشرات منه مقتطفات ، و هاد الكتاب اللي كلشي كايتسناه ف ميريكان دارو هاد الصحفي المعروف اللي كان هو سبب نشر مقالات تسمات من بعد بفضيحة ووتركيت اللي خلات الرئيس الامريكي ريتشارد نيكسيون يستاقل.
حسب ما نشرات الواشنطن بوست ف الكتاب عبارة عن شهادات قدموها مقربون لترامب و كايخدمو معه حاليا بلا مايدكرو وسمياتهم، وعاودو على شي لقطات غريبة وقعات، ومن بينها اللي وقع ليه مع وزير الدفاع جيم ماتيس اللي بعدما هضرو هو و ترامب على القواعد العسكرية الامريكية ف كوريا الجنوبية خرج الجنرال و قال “واش هادا رئيس ولا تلميذ ف القسم الثاني ابتدائي؟”، وهادشي حيث ترامب ولا كايسول اسئلة غبية .
وحسب الكتاب ديما، فان ترامب واحد النهار اتصل بالجنرال ماتيس وقال ليه : “شوف بغيتك تقتل بشار الاسد و تهينينا، ديرو شي عملية اغتيال”، و هاد المحادثة الهاتفية وقعات ف ابريل 2017 بعدما وقع هجوم كيميائي ف سوريا كانو اطفال كثر من ضحاياه.
الكتاب اللي عنوانه “الخوف: ترامب ف البيت الابيض” جا فيه ايضا ان سكرتير البيت الابيض جون كيلي اللي معروف بلي مقرب بزاف من ترامب وصفه حتى ” بالغبي و ماينفع معه نقاش ولا هضرة “، وقال ان خدمته الحالية ف البيت الابيض من اسوء المهام اللي دار ف حياته.
هاد التصريحات مزال ماعلقو عليها اللي تنسبات ليهم و حتى البيت الابيض مزال مادارش شي رد رسمي ولكن اللي معروف ان ترامب كل شهر كايفقد معاونيه و كايتزير، ويقدر ف اي مناسبة بعدما يكمل تحقيق التدخل الروسي ف الانتخابات يتعزل من منصبه.
الكتاب غادي يخرج نهار 11 سبتبمر الجاري، و “كود” غادي تنشر منه مقتطفات كما العادة.