حقيقة لقب نهيلة أملقي: الاَنسة عندها لقب وكالة لبنانية وماشي المسابقة العالمية المعروفة

لأن سميت موقعنا هو “كَود” اللي هي نيشان و ديريكيت وبلا زوراق، غادي نقولو ليكم اللي كاين و اللي ماقدروش المواقع الاخرى يقولوه،الانسة نهيلة املقي اللي كتعرفو عليها بلي هي ملكة جمال الكون ولا ملكة جمال المغرب لسنة 2018 و اللي ساكنة ف الامارات و اللي كانت كتقدم راسها خبيرة ف المكايج ف انستغرام تحت اسم باربي المغرب و اللي سمعتو عليها اول مرة ملي وقع ليها حادث مؤسف ماتو فيه جوج شباب ف مراكش.
اللي ماقدروش يقولوه الاخرين اما جهلا او شدا للخواطر هو ان الانسة ما ملكة جمال الكون ولا ملكة جمال المغرب ولا ستة حمص.. موقع ملكة جمال الكون الرسمي مافيه اصلا تا اشارة ليها، ومزال كاع ماختارو ملكة جمال الكون لسنة 2018.
هاهو رابط المسابقة ف ويكيبديا و فيه اللائحة ديال كاع الفائزات باللقب
وها الموقع الرسمي للمسابقة اللي معروفة عالميا
وهنا كايقولو بلي المسابقة ديال 2018 غادي تدار ف 17 دجنبر ف التايلند و المغرب كاع مامشارك اصلا
وهاهي لائحة ثانية مفصلة مافيهاش ريحة المغرب ولا الانسة نهيلة
اوا كيفاش الستون؟ كل ما في الامر ان شركة لبنانية محترمة سميتها “مكتب نوري ميديا” ناضت واحد النهار وعلى عكس المسابقة اللي معروفة ديال ملكات الجمال، اللي كتدير مسابقة فيها تغطية اعلامية عالمية و تصفيات من كاع الدول ، و فيها فعلا خبراء و منافسة بين البنات الزوينات ف كاع المجالات..على عكسهم هاد المكتب ناض و رشقات ليه و في ظروف غامضة، يعني ماشفنا لا اقصائيات ولا تغطية اعلامية ولا والو، و دار حفلة ف فندق ف بيروت و اعلن الانسة نهيلة ملكة جمال الكون، حيث هاد الشركة كتملك اسم Miss Universe Of The World 2018 اللي ترجمتو بالانجليزية غادي تكون رديئة وماعندهاش معنى ” ملكة جمال الكون للعالم ” في حين ان المسابقة العالمية سميتها “ ملكة جمال الكون” …بل ان هاد المكتب اللبناني داير واحد اللوكَو كايشبه ل علامة المسابقة العالمية و حسب موقعه ف الانترنيت داير” مسابقات “اخرى كثيرة بحال هادي .
المكتب اللبناني بطبيعة الحال مادار لا خدعة ولا نصب بل كان واضح ف الخبر الي تنشر و اللي جا فيه ” …السيد مازن نوري مدير عام مكاتب نوري ميديا شكر بدوره النقيب والمؤسسات الإعلامية العربية معلنًا أن "لقبُ" Miss Universe Of The World" – والذي تمتلكُ حقوقَهُ الحصريّةَ، شركةُ "نوري ميديا"….يعني لا علاقة بلقب ” ملكة جمال الكون” اللي كايقولوه شي مواقع و اللي كتروج ليه الانسة نهيلة براسها، بحال فهاد البوسط ديال انستغرام ديالها هنا
View this post on Instagram
باربياتي حبيباتي بنسبه اللي يسألون على سنابي هذا هو كلكم شرفوني ❤️❤️❤️
A post shared by Nouhaila Barbie l نهيلة باربي (@nouhaila_barbie) on Aug 27, 2018 at 11:37pm PDT
المهم ، حنا ما حسدناش الانسة، بصحتها اللقب ديال نوري ميديا، ولكن خص غير يكون الوضوح و الكلام يكون موزون و نعرفو شنو كانقولو ولا كنكتبو، هي “ملكة جمال الكون للعالم” ديال شركة نوري ميديا، نهار تكون ملكة جمال الكون ديال بصح نزيدو نباركو ليها و نتمناو ليها تمشي بعيد ف حياتها.