اسئلة كتبرزط. بعد خطاب العرش 20 اش بقى للاحزاب ما دير. كيفاش يقدر يدار تعديل حكومي من احزاب قواعدها هي اللي كتختار شكون يستوزر. كيفاش المشروع التنموي يتكلف بالصحة بالتعليم بالفلاحة بالاستثمار بالنظام الضريبي وعلاش كتصلاح الانتخابات والبرامج

خطاب محمد السادس البارح فالذكرى 20 لوصولو للحكم جاب مفاجئات. طرح امور غادية تكون عندها انعكاسات كثيرة على الحياة السياسية. على الاحزاب السياسية. على الديموقراطية ديالنا. الديموقراطية ما يمكنش تكون الا عبر احزاب قوية. عبد اللطيف المنوني مستشار الملك براسو فحوارو هو والمستشار الاخر عمر عزيمان٬ مع وكالة الانباء الفرنسية٬ هدر على الملكية البرلمانية كافق ماشي بعيد للمغاربة.
هاد الملكية البرلمانية قلبها هم الاحزاب السياسية. حقاش هاد الاحزاب اللي غادية تتكلف بكلشي. بتدبير حاضر ومستقبل المغرب. تدبير كاع الملفات.
خطاب الملك محمد السادس البارح اعلن على ما سماه الخيارات الكبرى للبلاد وهي “الملكية الوطنية والمواطنة” و”الخيار الديموقراطي التنموي” و”الاصلاحات العميقة”.
ثم هدر وهاد الشي هو اهم ما جا فالخطاب على إحداث اللجنة الخاصة بالنموذج التنموي” اللي غادي يتم تنصيبها فالدخول السياسي المقبل.
هادي فيها شخصيات توجد علاش فشل المشروع التنموي اللي كان واش خاصو يدار. هي هيئة استشارية قال عليها الملك باللي ماشي مؤسسة رسمية موازية او حكومة ثانية ولكن باش تشوف باللي هادي غادية تهتم بقطاعات “كالتعليم والصحة، والفلاحة والاستثمار والنظام الضريبي؛ وأن تقدم اقتراحات بشأن تجويدها والرفع من نجاعتها”
ماشي غير هاد الشي. الملك قال باللي خاص التركيز “على الرفع من مستوى الخدمات الاجتماعية الأساسية، ومن أداء المرافق العمومية” وهنا دعا الحكومة “الشروع في إعداد جيل جديد من المخططات القطاعية الكبرى، تقوم على التكامل والانسجام، من شأنها أن تشكل عمادا للنموذج التنموي، في صيغته الجديدة”.
ماشي غير المشروع حتى شكون اللي طبقو هدر عليه. اذ اكد ان “المرحلة الجديدة ستعرف…. جيلا جديدا من المشاريع. ولكنها ستتطلب أيضا نخبة جديدة من الكفاءات، في مختلف المناصب والمسؤوليات، وضخ دماء جديدة، على مستوى المؤسسات والهيآت السياسية والاقتصادية والإدارية، بما فيها الحكومة”
وكلف رئيس الحكومة يوجد ليه مقترحات “لإغناء وتجديد مناصب المسؤولية، الحكومية والإدارية، بكفاءات وطنية عالية المستوى، وذلك على أساس الكفاءة والاستحقاق” عندها ” عقليات جديدة، قادرة على الارتقا ء بمستوى العمل ، وعلى تحقيق التحول الجوهري الذي نريده”.
هنا يكون التساؤل على تجديد المناصب الحكومية يعني تعديل حكومي. الحكومة كيشرف على اختيار اعضاءها رئيس الحكومة فاطار التحالف ديالو بعد ذلك يعرضها على رئيس الدولة وهو اللي كيعين. وفاختيار الوزراء كاينين احزاب او حزب العدالة والتنمية عندو مسطرة حاطها لاختيار الوزراء. الى مثلا جاو وقالو راه هاداك عمارة او بوليف ما كيصلحش. اولا على اي معيار دار الحكم واخا يكون الحكم موضوعي كيفاش تقنع حزب باللي خاص تجيب كفاءة وطنية عالية ثم واش الاحزاب المغربية عندها كفاءة عالية فظل الظروف اللي كتعيشها الاحزاب واللي الدولة عندها مسؤولية كبيرة فيها. غير اطر بسيطة بغات تدخل للعدالة والتنمية فاخر انتخابات وما خلاوهمش.
دابا ايلى كانت شي كفاءة غادية تجي من القطاع الخاص من التقنوقراط. هنا السياسة غادية تموت. وهادي يتناقض مع “الخيار الديموقراطي التنموي” اللي هدر عليه رئيس الدولة فخطابو البارح.
ثم هاد القطاعات التعليم والفلاحة والصحة والاستثمار …. هي عماد برامج الاحزاب السياسية فالانتخابات التشريعية اللي كتوصل للحكومة. كيفاش يوجد مشروع تنموي واجد وتجي حكومة تطبقو. علاش تصلاح هاد الحكومة ايلى جات لجنة واعدتها.
السياسة خاصها تغير فالبلاد من الفوق للتحت. هاد الشي كاع لمغاربة كيقولوه. لكن ما خاصش قلب السياسة من غير المؤسسة الملكية٬ وكنقصد الاحزاب السياسية تخلص بوحدها.
اللي بان من البارح ان كلشي كيتسنى اش غادي يوقع فشتنبر فالدخول السياسي المقبل.