المرأة المغربية خاص تحارب وتناضل على حقها في الفضاء العام وخاص تحميها الدولة من التحرش ماشي تخبى فقهوة ديال العيالات وغدا طوبيس ديال العيالات وهاكة حتى نلقاو راسنا أفغانستان جديدة

الناس في العالم قرن هادي وهوما كيناضلو على حق المرأة وباقي الأقليات في الفضائات العامة، من قبل كان كولشي معزول وكل نوع ديال البشر عندو بلاصتو والفرز كان على حساب الجندر والعرق والدين والطبقة الإجتماعية، الناس ناضلو باش يكون الفضاء العام من حق أي مواطن وتكون مساواة وكولشي محمي بالقانون، ولكن في الدول المتشددة ولي مافيها حقوق غادي تلقى أنه كاين فصل بين الأجناس والطبقات والأعراق، وفي الوقت لي دول بحال السعودية كيتخلصو من هاد الفصل بين الجنسين وأصبح للمرأة عدة حقوق منها دخول المطاعم مع الرجال، حنا بدينا نشوفو مبادرات وأشكال تجارية وتسويقية جديدة باغا تردنا للقرون الوسطى، وتردنا لنفس الأنماط الإجتماعية لي العالم كيناضل ضدها حنا باغين نديروها اختياريا.
المرأة المغربية خاص تحارب وتناضل على حقها في الفضاء العام وخاص تحميها الدولة من التحرش ماشي تخبى فقهوة ديال العيالات وغدا طوبيس ديال العيالات وهاكة حتى نلقاو راسنا أفغانستان جديدة، علاش طفروه الدول لي دايرة الفصل بين الجنسين راه فيها أعلى معدلات ديال التحرش والإغتصاب والتعدي على حقوق المرأة، الإختلاط هو الحل، الدول لي فيها أقل معدلات ديال التحرش بحال اسكندنافيا مثلا راهب داو كيديرو الإختلاط حتى فالعسكر والرجال ولاو كيتزادو ويكبرو ويترباو بفكرة أن راه بحال لمرة بحال الراجل، والمرأة ماشي أداة للمتعة الجنسية خاص غير فوقاش نركبو عليها فأقرب فرصة، في بلدان الفصل بين الجنسين فين كتلقى هاد المشاكيل.
ملي تبدى المرأة تتخبى في أماكن خاصة بيها هذا كيعني أن المتحرشين ربحو المعركة وقدرو يسيطرو على الفضاء العام، وداك الساعة تولي أي مرأة بغات تكلس في قهوة عادية غادي تفهم بلي باغا شي حاجة خرى من غير القهوة، مادام أنه كاين قهوة غير ديال النسا فتمشي ليها الى بغات تهنى، الحل ماشي في فتح بلايص خاصة بالمرأة وإنما تولي المرأة محمية بالقانون ومن طرف الدولة وعندها حق فأنها تريح فأي بلاصة بلا متعرض لمضايقات أو تحرش أو إعتداء، وراه حتى دوك الشوفات وبنام ساكت حتى هوما كارثة، أما هادشي ديال أماكن خاصة بالنسا وبالغوز كيزيد غير يرسخ الفكرة ديال المرة بلاصتها الكوزينة وحتى الى خرجات خاص تمشي لصالون خاص فيه غير بحالها ويكون مصبوغ بالغوز لون الضعف والخضوع.