وفينك يا بوريطة علاش كتشوه بلادنا. حكومة مليلية: يا لمغاربة فتحو ممر انساني باش تخرجو ديولكم راهم كيعيشو وضع صعيب

الحكومة المحلية فمليلية طلبات من حكومة مدريد تدخل، عند لمغاربة باش يفتحو ممر إنساني لإجلاء المغاربة اللي حاصلين فهاد المدينة المحتلة ، بسبب اغلاق المغرب لحدوده البحرية والجوية والبرية بسباب كورونا.
وحسب وسائل الإعلام الإسبانية، فإن أزيد من 300 مغربي كيعيشو ظروف مأساوية فمخيم مؤقت مخصص لإيواء المغاربة العالقين فمدينة مليلية، خصوصا ملي طاحت الشتا وغرقات المخيم.
حكومة مليلية قالت أن الوضع غير انساني، وطلبات من مدريد بالوساطة عند المغاربة باش يردو " المُحاصرين" لديورهوم، مؤكدة ضرورة فتح الحدود البرية بشكل مؤقت بغية إجلاء هذه المجموعة من المواطنين.
دابا هادي مدينة الدولة المغربية كتعتابرها محتلة اي مغربية محتلة وهاد الدولة سادة حدودها على ناسها على ولادها. تناقض ما مفهومش.
هادو بحال ناس سبتة ما محتاجين لا طيارة لا باطو. علاش مخلينهم مكرفصين. كيفاش غادي تقنع اللي حاصل باللي بلادك رافضاك تدخل.
المسؤول الاول هو ناصر بوريطة. كاع سيادو وزراء خارجية الدول اللي كتحتارم مواطنيها تحركات. اسبانيا حلفات كيدخلو كاع مواطنيها فالعالم وحنا رافضين يدخلو فالحدود البرية مواطنيك. شوهة كبيرة