علاش تاتكذبو علاش ؟ جدودنا ماكانوش صحاح علينا هادي هضرة القهاوي ! جدودنا كانو كايموتو صغار و كانو العيالات بزاف كايموتو عند الولادة و هاد التقدم فالصحة د المغاربة الفضل الكبير فيه للطب الحديث و لابوراطوارات الادوية ماشي لمرددوش و البلبولة و حبة البركة

ديك الهضرة ديال جدودنا كانو صحاح علينا و كانو كاياكلو احسن منا حيت كاياكلو مواد طبيعية علميا ماكايناش !و الناس كاتعاود هاد الأزليات يا ايما عن جهل يا ايما باش تنشر الجهل ! و الخطير انه كاين من الناس لي قارين لي كايروج لهاد الافكار الغالطة ...
جدودنا ماكانوش صحاح علينا بالعكس ! جدودنا كانو كايموتو صغار بالمقارنة مع امد الحياة لي كاين دابا! و كان معدل الوفيات فصفوف النساء عن الولادة طالع حيت كانو كايولدو فالدار و فظروف غير صحية و كانت نسبة وفايات الاطفال طالعة حيت ماكانتش شي حاجة سميتها اللقاحات ! كانت ضربك حديدة مصدية تموت بالطيطانوس ! يعضك كلب تموت بالصعر ! ضربك عگرب تموت بالسم ! هادي الهضرة المعقولة لي مبنية على اسس علمية و على احصائيات و لي بغا يطالع عليها يقدر يدخل للسيت لمنظمة الصحة العالمية و لا السيت د وزارة الصحة و لا السيت ديال المندوبية السامية للتخطيط !
نقدرو نقولو انه من ناحية الماكلة و التطبيب اليوم كانعيشو فأزهى الفترات فالمغرب بالمقارنة مع الماضي! و داك الحنين للماضي حنين كذاب ! المغاربة ماكانوش كاياكلو مزيان شحال هادي و تا دابا مازال العادات الغذائية ديالنا ماشي صحية ! آشنو كانو كاياكلو هاد الجدود لي كاتهضرو عليهم ؟ الخبز واتاي حلو كايقطع؟! هادي ماكلة هادي ؟ زيت الزيتون ؟ لي العلماء كايشوفوه عندو هالة كبيرة بزاف و كاينين زيوت احسن منو بزاف فحال زيت الكولزا مثلا لي غني بالأوميگا طروا ! آش كانو كاياكلو البقولة و يرني و الحميضة؟ واش البقولة لي غاتصنع ليك جسد قوي ؟ آش كانو كاياكلو ؟ الخضرة طبيعية كانت قليلة و ماشي گاع المناطق المغربية متوفرة فيها ! و شوية د الخضرة وسط عرام د المرقة ماكلة ؟ و علاه كانت شي خضرة ففيگيگ ؟ فالجنوب الشرقي ؟ فالمناطق الجبلية الوعرة ؟! اللحم كان قليل ! ياك عباد الله كانو عايشين غي بالله يحسن العوان ؟!
راه اليوم لي المغاربة ولاو كايعتقو الروح شوية ! ولا بنادم كايعرف الفرماج و التفاح و الكبدة و البروكولي و الدجاج و الكفتة د بيبي و دانون ! اليوم لي المغاربة ولاو ماكايموتوش كي الذبان بأمراض بسيطة حيت كاين الدوا و كاين اللقاح ! ايه كاينين بزاف د العادات الغذائية الغير الصحية لي ورثناها من دوك الجدود النيت و لكن هادشي ماكاينفيش انه الوفرة لي كاينة فالماكلة اليوم احسن من البارح و انه كانداواو اليوم احسن من البارح !
هادشي كايقولوه الاحصائيات و الارقام ! و داك الحنين لي عند شي بعضين و خصوصا الخراقجية للماضي مبني على الكذوب و التخربيق حيت خاصك تكون مسخوط العلم مسخوط التيكينولوجيا مسخوط الحياة باش تتشهى ترجع للحقبة ديال جدودك لي كان فيها الجوع و المرض و الزلط منتاشر بين الناس و لي كانت فيها سخانة بسيطة تقدر تجمع ليك المطاوي و كان بنادم قاتلو غي البرغوت !