الجامعة الوطنية لأرباب الحمامات كتعارض وقفة كازا.. ورئيسها ل"كود": خاص الحوار مع المسولين بعدا.. وحنا تقصحنا بزاف وكاينة ناس بدات تسعى لكن الظرفية مكتسمحش بالاحتجاج

ماشي كَاع أرباب الحمامات فكازا مشاركين فالوقفة اللي غتدار غدا، بحيث الجامعة الوطنية لجمعيات أرباب ومستغلي الحمامات التقليدية والرشاشات بالمغرب كتشوف بللي مازال مامستوفياش شروط تنظيم احتجاج، على اعتبار أنها مازال ماتحاورات مع المسؤولين، والظرفية الوبائية ماكتسنحش.
"كود" تواصلات مع ربيع أوعشى، رئيس هذ الجامعة، اللي كتضم 8 جمعيات لأرباب الحمامات على الصعيد الوطني، واللي قال أن الجامعة ماشي ضد الوقفة، لكن كتشوف أنه خاص بعدا التحاور مع والي الجهة، ورئيس الحكومة، والحديث على مطالبهم فالبرلمان عن طريق مجلس المستشارين.
وبالإضافة لهذشي، صرح أوعشى أن مرسوم حالة الطوارئ المنشور فالجريدة الرسمية كيمنع التظاهر والتجمعات، و"بالتالي إلى درنا وقفة غير مرخصة ماغانعرفوش اشنو ممكن يوقع، والتظاهرات ممنوعة فهذ الوقت، وأنا كنشوف أنه إلى تمكنا من الحوار مع المسؤولين، فغيبقى عندنا خيار المحكمة"، على حد تعبيرو.
وتساءل كيفاش لنقابة تحلات هذي شهر، كيف قال، تدير خطوة بحال هذي، فالوقت اللي الجامعة "كتناضل من شهر مارس من احل حقوق أرباب وعمال الحمامات"، كيف قال.
وقال أن أرباب الحمامات تضررو بزاف بعد إغلاقها فكل من كازا والمحمدية ووفاس وقنيطرة وأكَادير، بحيث ان مالين الحمامات عام وهوما كيعانيو، وفالوقت اللي كانو كيعاونو الخدامة ديالهم، دابا مابقاو يقدو يعاونو حتى راسهم، وخرجو ولادهم من المدارس البريفي، ومابقاو عندهم ما يصرفو، "فما بالك بالعمال، راه الناس بدات كتسعى"، على حساب هضرتو.
وزاد: "ومنين كيتسدو الحمامات حتى البنية التحتية ديالها كتهترأ، وضروري غيخصها إصلاحات، والدعم اللي خديناه ديال 2000 درهم للشهر ف3 شهورراه ماداير لينا والو".
وأكد أن الجامعة دايرة اجتماعات مع هياكلها، باش تشوف تشوه الحلول اللي ممكن تدار، وعلى رأسها طلب الحوار من المسؤولين.