خلفيات استقالة الرميد.. الرجل اللي نقد البي جي دي من سيناريو الاخوان المسلمين وفضل يخسر شويا ويربح شويا

"مع بنكيران نربحو بزاف ونخسرو بزاف ومع بنعرفة نربحو شوية ونحسرو شوية" هكا كانت خطة مصطفى الرميد، وزير الدولة المكلف بحقوق الانسان، مهندس حكومة ما بعد البلوكاج اللي وقع عام 2017 لعبد الاله بنكيران.
اليوم الرميد عبر بشكل صريح بلي مبقاش باغي يزيد خطوة فالعمل السياسي، بسبب طريقة تدبير عدد من الملفات، كان ضد توجه الأمانة العامة، منها تقليص المشاركة فالانتخابات المقبلة، فكرة غايكونو ندمو عليها قادة الحزب بعدما جا القاسم الانتخابي.
فعهد هاد الوزير، كانو ضربات له، كاين اللي خونو واعتبرو هو السبب فهادشي اللي وصل ليه البي جي دي، ولكن ناس اللي عارفين الرميد، عارفين بلي الاجتهادات اللي كيقدم كلها فصالح البي جي دي، وخدماتو. التنازل بالنسبة له مرتبط بالتحولات الاقليمية والوضع الداخلي، وديما كيبعث برسائل للدولة.
الرميد اللي فضل التنازل فمرحلة حساسة بزاف، خصوصا ف2016، اقليميا فمصر الاخوان المسلمين شتتهم السيسي وقمعهم ودخلهم الحباسات، الاسلاميين نحاوهم فمراكز السلطة فالدول العربية، وما يسميه البعض بفترة الخريف العربي، هاد الشخص كان عندو دور كبير في اخراج تجربة البي جي دي من عنق الزجاجة، ومن مسار يمكن يوصل للصدام والصراع مع القصر، إلى مسار "التنازل" والتوافق وباللي كان، هاد المسار اللي تم فيه اشراك حزب الاتحاد الاشتراكي اللي مجابش مقاعد كثيرة واللي خدا منصب رئيس مجلس النواب وخدا مناصب مسؤولية كبيرة فمؤسسات الدولة، عكس البي جي دي اللي تقريبا مخدا تا شي رئاسة منصب من المؤسسات الدستورية (مجلس المنافسة تعطا للاتحادي ادريس الكرواي، والمجلس الوطني لحقوق الانسان لأمنة بوعياش، والمجلس الاقتصادي والاجتماعي والبيئي احمد رضا الشامي).
قبول الاتحاد الاشتراكي، رغم اعتراض بنكيران، كانت الضربة التي قسمت ظهر العدالة والتنمية، ورغم ذلك واصل الرميد اقناع قادة العدالة والتنمية بحساسية المرحلة، وبضرورة القبول بالشروط التي فرضت تشكيل حكومة العثماني.
تدبير مرحلة الانقلاب على بنكيران، لعب فيها الرميد دور كبير، وبان الدور من خلال الاستقبال الذي حظي به أثناء تعيين سعد الدين العثماني رئيس الحكومة، الرميد كان حاضر فالقصر الملكي بالدار البيضاء، وهنا بان الدور الكبير ديالو.
طبعا الرميد عندو طريقة فالتفاوض، طلب من حزبو تقليص المشاركة وقبل ف 2015 طلب من بنكيران تقليص الخرجات ديالو، حسب تقارير اعلامية، كانت عندو حسابات للمرحلة، كيبغي الخطوات اللي يدير الحزب ميكونوش انتحارية، الرميد باغي تدوز التجربة بسلاسة بحكم أن المغرب هو البلد الوحيد فالدول العربية اللي خلا الاسلاميين يترأسو الحكومة لولايتين، بعد حراك 2011.
مور تشكيل الحكومة ديال 2016، بان خلاف كبير بين بنكيران والرميد، الخلاف اشتد بزاف، حتى أن بنكيران هاجمو شحال من مرة وخصوصا ف قضية لباس ماء العينين، خصوصا فاش قال بنكيران مخصش نردو الحزب محاكم التفتيش.
محن الرميد مسالاتش هنا، فالسنوات الاخيرة بانت الخلافات مع العثماني، خصوصا في تدبير الحكومة العلاقة مع البرلمان، وهادشي خلاه يقدم استقالتو من الحكومة.