بنعرفة وصحابو اللي باعو بنكيران كيهدرو اليوم على "المصداقية" و"الديموقراطية". اش من مصداقية عندكم باش ربحكم واحد الانتخابات وتحالفتو تجريو عليه وفين الديموقراطية فهاد الشي

حزب العدالة والتنمية نسخة بنعرفة وصحابو كيعتاقدو ان لمغاربة ما عندهمش ذاكرة. البارح قدم احد اتباع تيار بنعرفة وهو نجيب بوليف عضو الامانة العامة للحزب ما سماه شعار البرنامج الانتخابي للانتخابات المقبلة. هاد الشعار قال مبني على 3 امور وهي "المصداقية" و"الديموقراطية" و"التنمية".
باش تكون التنمية اكيد خاص اللي جابها يكون عندو مصداقية وواصل بطريقة ديموقراطية. ولكن هادو كيضحكو على لمغاربة. كيقولو المصداقية تروم استرجاع الثقة بين مختلف الفاعلين وفي المؤسسات والديموقراطية هي "اداة تنزيل التعاقد الاجتماعي المؤسس على التابث الدستوري المتمثل في الاختيار الديموقراطي".
اجيو نشوفو تطبيق هاد الشي عند الحزب ف2016. حزب خارج من اول تجربة حكومية ولكن عندو ميسي فالسياسة اللي هو بنكيران. بوحدو ربح حزبو وجاب 125 مقعد وجا اللول. بوحدو طيح الياس العماري والتراكتور ديالو. بوحدو ربح ولد زروال فالدولة وفالجمعيات وفالزوايا وفالاحزاب وفالنقابات. دار الحملة الانتخابية حتى فالمحمدية اللي كان مرشح فيها اللي اليوم رئيس الحكومة. يعني حتى المقعد ديالو او جوجت المقاعد اللي جابو كان بفضل هاد السياسي.
تكلف باش يشكل الحكومة فظروف استثنائية. الوضع السياسي ديك الوقت ماشي هو الوضع السياسي ف2011 وهامش تحركو تقلص. ترفض عليه الاتحاد الاشتراكي او هاد الحزب بقيادة لشكر بغى يقولبو. قبل طلب منو يعلن تشكيل الحكومة وهو بقى يتسنى يدار مؤتمر التجمع الوطني للاحرار حقاش عارف راه ديما كاين فالحكومة٬ باش شاف مناورات لشكر٬ رفض يدخل فحكومتو. بقية القصة عارفينها من بلاغ "انتهى الكلام" حتى تعيين هادا اللي جا فبلاصتو.
للتاريخ اول واحد استعمل كلمة بنعرفة هو مصطفى الرميد. كان قال فتصريحات صحافية سولوه واش ممكن يجي فبلاصة بنكيران٬ "انا ماشي بنعرفة الحزب" وعليه المنطق كيقول اللي جا فبلاصة بنكيران هو بنعرفة.
تعلن اسم رئيس الحكومة وكلشي صحاب البي جي دي نساو بنكيران. تخلاو عليه. طعنوه. لاحوه غير على مصالحهم. باش تكون عندهم شي شكارة حكومية او فالديوان.
دابا فين المصداقية يا بوليف وغيرو. واي مصداقية كتهدرو. مصداقية طعن السياسي اللي وصلكم للمرتبة الاولى. دابا شكون يديها فيكم. راه باش كتقولو هاد الكلمة كتضحكو غير على ريوسكم.
ثم اش من مصداقية لحزب قبل القاسم الانتخابي وصوتات عليه الاغلبية والمعارضة. قبلو ماشي التصويت عليه. قبلو سياسيا. حقاش ايلى بصاح كان ضد هاد المشروع كيف جا فالتصويت كان يخرج من الحكومة. هادي هي المصداقية ماشي بالهدرة. بالفعل.
هاديك الديموقراطية بلا ما نهدرو عليها. راها كتعني شعب انتخب سياسي وولى كيعرفو كثر من الحزب وباش جات لوزيعة كلشي دور وجهو. هادي وقعات لبنكيران مع صحابو.
قبلتو الذل وقبلتو الاهانة وضربتو الديموقراطية وتخليتو على المصداقية وكونو تحشمو وعلي الاقل حيدوها من الشعار الانتخابي للحزب