ردو البال من الفايك نيوز.. ميساج ف واتساب فيه معلومات خطيرة وغالطة على كورونا وولات متداولة بزاف.. والطبيب الداسولي كيوضح حقيقتو ل"كود"

هذ الأيام كيتداولو رواد تطبيق "واتساب" ميساج كلو فايك نيوز على كورونا، كيقلل من الخطر ديالها وممكن يخلي الناس مايبقاوش واخدينها بجدية، والمشكلة انه متداول مئات المرات، كذلك فمجموعات اللي كيفوقو اعضاءها 200 شخص، وبنادم متيقو.
الميساج الفايك نيز كيقول أن سنغفورة شرحو مؤخرا، ولأول مرة فالعالم، جثة واحد مات بكورونا، ولقاو ان الفيروس ماشي فيروس، بل مجرد باكتيريا كتسبب تختر الدم، وأن علاجها باين ميتمتل فأخذ عقاقير الأسبيرين العادية الموجودة فالفارماسيانات، وبالتالي "الفيروس كذبة عالمية".
فردو على هذشي، قال الدكتور بدر الدين الداسولي، رئيس النقابة الوطنية لأطباء القطاع الحر، أن القول بأن كورونا ماشي فيروس كلام على عواهنه، "هذا فيروس مافيهش المزاح، وإلا ماكانش تحليل الPCR ديال الفيروسات تخرج عند الناس الإيجابية فاش كيكونو مصابين، لو كان ماشي فيروس كان كلشي يخرج مصاب"، حسب تعبيرو
وقال الداسولي، فتصريحو ل"كود"، ان هذشي اللي كيقولو جابتو سنغفورة هو ماشي جديد، وماشي لأول مرة كيتم تشريح مصاب فالعالم بكورونا فسنغفورة، بل شرحات إطاليا بزاف ديال المصابين، وهوما اللولين اللي بداو، وعرفو أن الأوعية كيوقع فيها تجلط الدم، وحقيقة إصابة المصاب بهذشي ماشي سر.
"راه حتى حنا فالمغرب كناخدو الأسبيرين المضادر لتختر الدم، وضروري ما تعطى معاه مضادات حيوية، حيت المرض ماكيديرش غير هذشي، بل معروف أنه كيدوز من 3 مراحل: مرحلة الأعراض، والتهاب الكبير اللي كيتضرب للصدر، وعاد تجلط الدم"، كيف شرح الداسولي.
وزاد: "المرض ولا معروف وهذشي كلو كيبقى هضرة، الحاجة الوحيدة اللي يمكن تسلك هو لابد من اللقلح، والتباعد خاص يكون والكمامة، وكيبقى هذا السبيل للتعايش مع الفيروس".