سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
باش تجمع الطاشرون مع لفلوس مع الضصارة يعطيوك العلام. عائلتو دايرة البلطجة فبحر بوزنيقة. سلخو 3 العائلات والطاشرون كيدعي باللي صاحب مولاي رشيد وكيجي لدارو عامل بنسليمان وصاحبو عبد النباوي
فاقامة ايدين آيلند فشاطيء ببوزنيقة عاشت 3 عائلات ايام كحلة فهاد ليام بسباب فتوة عائلة الطاشرون الملايري العلام. وفق شهادات جابتها "كود" فهاد الاقامة كانت هانية وفيها ناس من الطبقة المتوسطة والفوق حتى وصلات هاد العائلة. شراو شي ديور فهاد الاقامة وبداو كيطبقو قانونهم. اللي دوا يرعف. وفق شهادة لاحد السكان ل"كود" فعائلة الطاشرون لملايري كيلعبو ماشي بكواد عادي اللي اصلا ممنوع فكاع اقليم بنسليمان اللي تابعة ليه هاد الاقامة٬ بل بواحد كيكون غير فالصحرا وغالبا عند العسكر. عندهم جوج منو وضدا فكلشي كيبقاو يلعبو. باش كيقيسو شي مواطن بالرملة او كيصدعوه٬ ايلى زغبو الله وتشكى٬ كيمشي يجيب شي 12 واحد من العائلة وكيسلخوه. هادا كان نصيب جوج عائلات والبارح الجمعة كملات بعائلة 3. اللولين كلاو لعصا ومن بعد تخلعو وما قدروش يقدمو شكاية. ديال البارح للي مدير فشركة معروفة واسمو "س. م" مشى البارح الجمعة فالليل حط شكاية فلابريگاد الجدارمية فبوزنيقة. دابا كيدير شهادة طبية وما باغيش يتسامح معاهم. الغريب وفق شهادة اخرى ل"كود" انو باش مشى عند الجدرامية وكان معاه شهود من الاقامة٬ قال قدام الجدارمية باللي "هو اللي تعدى علي" وزاد وهادي خطيرة "ولا بغيتو نجيب ليكم حتى 400 شاهد٬ راه الشاهد كيسوى عا 300 للراس. كاين شي احتقار للقضاء للجدارمية كثر من هاد الشي. كان قدامهم وسمعوه وما هدروش. ياك ما كيخلع حتى الجدارمية. ياكما كيحكم فحرمو وما فراسناش حقاش هاد الطاشرون اللي قلبها بلطجة فاقامة بشهادة مواطنين٬ كيدعي باللي هو صاحب الامير مولاي رشيد. طالقها فالاقامة باش يخلع السكان. طبعا ماشي غير الامير اللي كيقول صاحبو. حتى عامل بنسليمان سمير اليزيدي كيدعي باللي كيجي لدارو. سبق وقال لصحابو باللي صاحبو كذلك هو عبد النباوي الرئيس المنتدب للمجلس الأعلى للسلطة القضائية. باش سولنا على هاد الادعاء الاخير عرفناه باللي غير ادعاء واشاعة وكذوب. اكيد ان باقي الادعاءات كذوب. غير هو تعامل الجدارمية معاه البارح٬ وفق ما نقله شهود ل"كود"٬ غريب ومريب. بحال ايلى كيخافو منو. دابا هادي مناسبة مع هاد الشكاية او غيرها باش النيابة العامة دير خدمتها. نعرفو هادا اللي كان دار عرس فعز الكونفينمون وتقدم قدام الوكيل قبل اشهر.
