المغاربة تفاجؤوا بزيادة الجرعة الثالثة من اللقاح ومعرفوش واش يدروها ولالا.. ربة بيت ل "گود": واخا سمعنا بلي كتزيد المناعة خاص مزال نفكر واش نديرها

من بعد القرار ديال وزارة الصحة بتطعيم الجرعة الثالثة من اللقاح، من اجل تعزيز المناعة ضد فيروس كورونا المستجد، المغاربة بداو كيطرحوا تساؤولات.
وفهاذ الصدد كتقول فاطمة، ربة بيت، ل "گود": " مزال كنفكر واش ندير الجرعة الثالثة ولا لا، واخا سمعنا بلي كتزيد المناعة وانه دول اخرى حتى هي دارتها." موضحة انها مزال غادي تفكر فالموضوع أكثر وتسول عليه.
بالنسبة لايمان طالبة جامعية، كان عندها جواب اخر وقالت ل"كود": " انا معنديش مشكل ندير الجرعة الثالثة من اللقاح لانه غادي يحمينا من كورونا لي غادة وكتطور، ومعرفناش شنو يقدر يكون من بعد، هادشي علاش من الأحسن ناخدو الاحتياطات ديالنا".
واكدت ايمان بانه هذا هو الحل باش نرجعوا لحياتنا الطبيعية كيف قبل. واضافت: "عيينا من هاذ الاجراءات الاحترازية والتوصيات" وفق تعبيرها .
ومن جهة قالت نهاد, موظفة، ف تصريح ل "گود": "كانوا كيقولوا بلي الجرعة الثانية كافية لتوفير المناعة ضد الفيروس واليوم اصبحت جرعة ثالثة ومعرفناش واش تقدر تزاد شي جرعة اخرى فالمستقبل". مشيرة الى انه على وزارة الصحة تعطي توضيحات اكثر ف هاد الموضوع.
وزارة الصحة زادت الجرعة الثالثة تبعا لتوصيات اللجنة العلمية الوطنية والتوصيات العلمية العالمية، واوضحت انه سيتم ابلاغ المغاربة باجراءات وكيفيات الاستفادة من هاد الجرعة، وشكون هوما الفئات المستهدفة، قريبا.