بما أنا فاس العاصمة العلمية والروحية علاش ماتكونش حتى عاصمة الحشيش في المغرب السياحة كتموت والطريقة الوحيدة لإنعاش هاد القطاع هي القهاوي والرياضات والمحلات تعطاهم رخصة لبيع الحشيش والكيف وباقي المنتجات ديالهم بحال غريبية أو كعب غزال بزيت الكيف

في 2019 كثر من 20 مليون سائح لي زارو أمستردام كثر من سكان الدولة كلها، لدرجة أن أمستردام قررات أنها تدير تسقيف لعدد السياح مايفوتش عشرين مليون في العام، صافي شبعو مابقاوش بغاو السياح كثر من القياس لي بغاو، هادي غير مدينة ماشي دولة، حنا بلاد على قدها بثلجها وصحرائها وغاباتها ومدنها الجديدة والقديمة والعتيقة وبمراكشها وفاسها وأكاديرها ويالله فاتت النص في هاد الرقم بشوية، من بين أسباب زيارة أمستردام من غير طبعا أنها جات في العالم المتحضر وعندها تاريخ تجاري كولونيالي وفيها مايتشاف فيها أيضا الحرية المفتقدة في بلدان أخرى من العالم المتحضر، فيها الزطلة موجوة وقانونية كتباع في قهاوي خاصين، ريح وشري الطريفة ديالك وتكيف على راحتك وزيد، متعة لي يمكن تمارسها في هولاندا ومايمكنش تمارسها في المغرب البلد المنتج، كاين شي حماق كثر من هذا.
بما أنا فاس العاصمة العلمية والروحية علاش ماتكونش عاصمة الزطلة في المغرب، كتامة غير مع الدورة والمدينة القديمة عامرة كوانات صالحين غير للتباوق، عرام ديال الرياضات والقهاوي صغار ومقادين مزيان مشاريع داروهم شباب راهم كيموتوا دابا بسباب كورونا، والطريقة الوحيدة لإنعاش هاد القطاع هي هاد القهاوي والرياضات والمحلات تعطاهم رخصة لبيع الحشيش والكيف وباقي المنتجات ديالهم بحال غريبية أو كعب غزال بزيت الكيف، هادشي راه ماشي ضحك هادي راه صناعة بالمليارات في أمريكا، الناس مابقاوش كيبرمو الجوانات كياخدو حلويات وكيكات ومأكولات زوينة كتباع في كافتريات خاصة مصاوبة من مستخلصات القنب الهندي، كتبوق بلا شوهة بلا ماتحرق حوايجك بلا ريحة بلا سلوكات مشمكرة، عوض هاد البزنازة الواشمين المخططين لي منتاشرين في المدينة ولي ممعروفش أصلا آش كيبيعو وباش مخلط داكشي، علاش متوليش هادي صناعة سياحية حقيقية عوض هاد الكذوب على الذات لي كتمارسو الدولة والمغاربة على راسهم ولي مضيع عليهم اقلاعة اقتصادية حقيقية.
كاين قهيوات صغار زوينين مستيليين ولكن كتلقى مثلا أنا كاس ديال أتاي فيهم فايت عشرين درهم، بالله عليكم آش غادي يكجدر الواحد تم الى مكانش الهدف يتبوق، كتسمع لاتيراس فاش كتطلع ليها كتلقاها كتطل غير على الجيران بحال الى كالس في قبر غير هو قبر مستيلي، أصلا كليانهم سابقا ولاحقا راه كان كيجي على ود الزطلة ويعيش الأجواء ديال الخميائي، إذن علاش مايوليش هادشي قانوني وتسوق مدينة فاس كمدينة الثقافة الروحية والروحانية والبسيكيديليك، راه واحد الوقت كان المغرب جنة هاد النوع من السياحة وجاو فنانين كبار عالميين دوزو فيه بزاف، ليد زيبلن رولينغ ستون جيمي هاندريكس ديميس روسوس هادو جاو باش يتبوقو ويطيح عليهم الإلهام ويبدعو وداكشي لي كان، دابا دول أخرى مستافدة من الحشيش المغربي والمغرب ضايع فيه وكيشوف بعينيه مفتوحين غير هكاك، واش حنا غادي نفهمو حسن من ميريكان وكندا ودول أخرى كثيرة لي قننوه ودابا كيتباع في المحلات والنتائج الاقتصادية مبهرة وحتى الكسايد والجرائم قلالو حيت مابقاش بنادم كيمشي عند البزناز مرعود وزربان ومقطوع، دابا كيسيفطوهاليه حتى للدار بكلوفو، تقنين الزلطة هو الحل الوحيد لإنقاذ السياحة في البلاد.