الاعتراف الاسباني لمغربية الصحرا. ديبلوماسي ل"كود": راها مسيرة بيضا لمحمد السادس بعد المسيرة الخضرا للحسن الثاني

وصف ديبلوماسي مغربي فتصريح ل"كود" الاعتراف الاسباني بمغربية الصحرا من خلال رسالة رئيس الحكومة الجمعة اللي فاتت للملك محمد السادس ب"الحدث التاريخي" و"الانتصار الكبير".
المصدر قال ل"كود" "اللي وقع راه مسيرة بيضا "الملك الراحل الحسن الثاني دار المسيرة الخضرا لاسترجاع الصحرا واليوم الملك محمد السادس دار مسيرة بيضا".
مصدر "كود" شرح اكثر هاد القضية "الاعتراف بمغربية الصحرا من قبل امريكا مهم. قرار المانيا عندو اهميتو. دور فرانسا فالقضية اساسي٬ لكن هادي راها اسبانيا. المستعمرة السابقة للصحرا. كان عندها دور فالماضي وعندها دور فالحاضر فالقضية. ضمن مجموعة اصدقاء الصحراء وكل المفاوضات حول القضية تمر بمدريد حتى الطائرات اللي كيتحركو بيهم المبعوثين الخاصيين للامين العام الى الصحرا كتكون صبليونية. باش تعرفو اهمية هاد الدولة". يوضح الديبلوماسي ل"كود".
كما تحدث ل"كود" عن تأثير موقف مدريد على دول كثيرة خاصة امريكا اللاتينية٬ بسباب دور هاد الدولة فتلك المنطقة. اكيد دول كثيرة غادية تعتارف بمغربية الصحرا من غير الدول اللي سبق ليها واعتارفات
باستحضار هاد الشي كولو وباستحضار دور الملك محمد السادس فاعادة رسم قواعد جديدة للتعامل مع المغرب وصلنا لهاد "المسيرة البيضا" يضيف مصدر "كود".
ملك "ارسى قواعد ملكو فاذهان كاع حكام العالم. اعطى جهده لتنمية بلادو. حدد طريقة التعامل مع بلادنا. شفنا كيفاش مشى لافريقيا. اش وقع مع اوربا. رسالة سانشيت واحد من تجليات تتويج هاد العمل" يؤكد مصدر "كود".