المغرب حقق إنجاز تاريخي فكأس العالم وتأهل لربع النهائي من بعدما ربح إسبانيا بالبيلانتيات

تأهل المنتخب الوطني المغربي إلى ربع نهائي كأس العالم قطر 2022، لأول مرة فالتاريخ ديالو من بعدما ربح منتخب إسبانيا فثمن نهائي البطولة اليوم الثلاثاء فتيران المدينة التعليمية بضربات الترجيح.
وسالا الشوط الأول والثاني من الوقت الأصلي ديال الماتش ما بين المنتخبين المغربي والإسباني بالتعادل السلبي زيرو لزيرو، وكان الاستحواذ فيه للإسبان اما المنتخب المغربي رجع للخلف وسد المساحات، ولكن من ناحية فرص التسجيل ديال المنتخبين فكانت متكافئة الخطورة، الفرق كان اللياقة البدنية اللي نقصات عند المغاربة بزاف مقارنة مع الإسبانيين بالرغم من التغييرات اللي دار وليد الركراكي ولكن هادشي راجع لكون المنتخب المغربي كان يجري ورا الكرة عكس المنتخب الإسباني اللي كانت فأرجل اللعابا ديالو الماتش كامل.
وبداو الشوطين الإضافيين ما بين المغرب وإسبانيا وكان الضغط مرة أخرى من جانب الإسبان، وليكونتر أتاك ديال المغاربة كانت خطيرة، وخصوصا من طرف وليد شديرة اللي ما عرفش ينهي الكرة فالشبكة وكثر من مرة ضيعها قدام مرمى إسبانيا وببشاعة، وبقات النتيجة كيفما هي زيرو لزيرو، ومشاو المنتخبين لضربات الترجيح اللي تألق فيها لكول المغربي ياسين بونو، سالات بفوز المنتخب المغربي بنتيجة 3 لزيرو وتأهل لربع نهائي كأس العالم لأول مرة فتاريخو.