واخا سطات فلاحية راه العافية شاعلة فأسعار الخضرة.. جولة فأشهر سوق بالمدينة بينات أن المواطنين تقهرو وكاعيين بزاف وكيشكيو من هاد الغلا

جولة فأشهر سوق بسطات، وهو سوق شطيبة، كتبين ليك بللي بزاف ديال الناس طالع ليهم الدم وكاعيين على العافية للي شاعلة فالأسعار، وبالخصوص الأسعار ديال الخضرة للي ارتفعات بواحد الشكل معمرو تعرف فهاد المدينة الفلاحية بامتياز.
وعاينات "گود" فجولتها أن خيزو لي تعطيه لقنية ماتاكلوش داير خمسة دراهم، أما إلى بغيتي خيزو العادي خصك 12 درهم هي القليلة.
المواطنين فهاد السوق ساخطين وراه حتى الطلابة لي هما فئة مقودة عليها هذا هو السوق لي كيجيو يتقداو منو.
هذا غير في شطيبة، أما الأسواق الأخرى بحال گيسر وبن أحمد وراس العين راه متقدرش تدخل ليهم بالغلا للي كيكوي الجيب، وهاد الشي مكيبشرش بالخير .
واحد الخضار قال في تصريح ل"كود "، "ثمن الخضرة ارتافع بزاف بحيت كان صندوق ديال مطيشا شحال هادي دير غير 20 درهم اولا غلا يوصل ل100 درهم، دبا راه الصندوق ساوي 300 درهم يعني مطيشة كطيح علينا ب10 درهم للكيلو، راه هاذ الغلا فالخضر جاي من المارشي ديال الجملة"، مضيفا أن هامش الربح نقص عدنا دبا راحنا غير تعادل مع المواطن راه خاص حلول .
وسيدة قالت حتا هي أن الأثمنة ارتفعات بزاف وأن الناس لي تتجي للسوق مبقاش تحط يدها على اللفت او خيزو لي كانت تتاكلو عير لبهايم، والناس تتموت بالجوع حيت مطيشا وللا الثمن ديالها 10 دراهم، والبطاطة 8 دراهم، الناس أش غدي تاكل أو فين غادي يمشي ولعندو الدراري صغار أو كاري اوزيد الماء والضو أش غادي يدخل لوالدو في عز هاد شياط لي نيض فالخضرة. راني لاحظت بزاف ديال العيالات تيدخلوا لسوق او تيرجعو الكفة هكاك مطوي حيت معندهمش الجهد ديال اشريو الخضرة حينت غالية بزاف، تا لخر ديال السوق مبقاش اقدرو اشريوه.