مؤتمر الأصالة والمعاصرة بتكلفة أقل من مليار.. و9 ايام قدام المنصوري باش تعلن الترشيح وقيادي ل"گود": أغلب قادة البام معها ولكن رفضات

سالا البارح لقاء المكتب السياسي لحزب الأصالة والمعاصرة، لي تم فيه وضع اللمسات الأخيرة استعدادا للمؤتمر الوطني الخامس المزمع عقده أيام 9/10/11 فبراير الجاري بمدينة بوزنيقة.
وحسب مصدر "گود" فإن المكتب السياسي قدر تكلفة المؤتمر بلي غاتكون قل من المؤتمر السابق (للي كانت فيه مليار و200 مليون سنتيم)، ودبا غاتكون التكلفة أقل من مليار لعدة أسباب هو أنه هاد المرة كاين ترشيد التمويل، ومخداوش أوطيل فحال مزاگان فالمؤتمر السابق.
قادة البام حاولو يقنعو فاطمة الزهراء المنصوري، باش تعلن ترشيحها، ولكن هي مبغاتش حسب قيادي بارز. غدا الجمعة غايكون بداية تلقي اللجنة التحضيرية للترشيحات، في ظل الضبابية حول مصير الأمين العام الحالي عبد اللطيف وهبي، لي عندو معارضة داخلية قوية من طرف تيار مراكش.
فعهد وهبي تحول البام إلى حزب عادي، بدل نظرة الأحزاب عليه تحالف مع البي جي دي، كسر طابوهات التيار السابق للي متحكم فيه إلياس العماري، شفنا حزب عادي قياداتو كيتحاكمو.
واش مرحلة المحامي وهبي سالات؟ وبدات مرحلة المحامية المنصوري؟. مزال الباميين كيتسناو الوحي يجيهم بالحل السليم للي ينقذ مؤتمرهم من أي أحداث أو صداع أو مضاربة كيف وقع فالمؤتمر السابق.
الاستعدادات لهاد المؤتمر، لي واقف عليها سمير كودار، نائب الأمين العام، غادا مزيان خصوصا من ناحية اللوجستيك والتنظيم، بحيث وجدو قاعة كبيرة فبوزنيقة وجميع الظروف باش يدوز المؤتمر مزيان.