باغي يتورخها بإنجاز غير مسبوق للكرة المغربية: لقجع فرح بلاعبات المنتخب المغربي بعد الرباح الكبير على تونس وموتيفاهم يربحو زامبيا ويتأهلو لأولمبياد باريس

عبر فوزي لقجع رئيس الجامعة الملكية المغربية لكرة القدم على الفرحة ديالو الكبيرة بتأهل المنتخب الوطني المغربي النسوي، للدور الرابع من الإقصائيات المؤهلة لأولمبياد باريس 2024، وباغي يتورخها بتأهل غير مسبوق للمنتخب النسوي للألعاب الأولمبية، بعدما ضمن المنتخب الأولمبي ذكور فالعهد ديالو الحضور فأولمبياد 2024 بعدما غاب على هاد التظاهرة من 2012.
فوزي لقجع ما ترددش فالتعبير على الفرحة ديالو وما خباهاش بعدما سالا ماتش المنتخب المغربي ضد تونس ضمن إياب الدور الثالث المؤهل إلى الألعاب الأولمبية واللي ربحوه اللبؤات، البارح الأربعاء، بنتيجة 4 لواحد فملعب مولاي الحسن فالرباط، وتأهلو للدور الرابع، ومباشرة بعد نهاية الماتش نزل لقجع للتيران باش يشارك الفرحة ديال الرباح والتأهل للدور الحاسم مع اللاعبات، وبارك لهم لاعبة بلاعبة وفرح وكبر بهم هما والمدرب جورج فيلدا والطاقم التقني، وحمسهم باش يزيدو يعطيو كثر ويركزو على مواجهة زامبيا فالدور الرابع والأخير المؤهل إلى الأولمبياد.
وتأهل المنتخب الوطني المغربي النسوي إلى الدور الرابع المؤهل إلى أولمبياد باريس، ودابا غيلعبو مع منتخب زامبيا اللي تأهل على حساب منتخب غانا، وهذا الانتعاش اللي كتعيشو الكرة النسوية فرئاسة فوزي لقجع للجامعة الملكية المغربية لكرة القدم عمرو كان وسابقة فالكورة المغربية.