عمدة مراكش السابقة المنصوري غضبانة بزاف على بنكيران ل"كود": اهانة للمغاربة نشوفو السلطة التنفيذية مضاربة مع السلطة التنفيدية وسط المؤسسة التشريعية وسيدنا ما اختاركش كشخص وباراكا من التوظيف الايديولوجي والتهريج ولا جاك الموضوع كبير حيد من منصبك

هاجمت فاطمة الزهراء المنصوري القيادية في الاصالة والمعاصرة تدخل رئيس الحكومة عبد الاله بنكيران في مجلس المستشارين الثلاثاء الماضي. العمدة السابقة لمراكش استغربت اسلوب تدخله واعتبرته في تصريح ل"كود"، "اهانة للمغرب وللمغاربة"؟ كيفاش "رئيس الحكومة سلطة تنفيذية هاجم داخل سلطة تشريعية وزير التربية والتعليم رشيد بلمختار الذي يمثل هو الاخر سلطة تنفيذية" ترد المنصوري في تصريحها ل"كود". وقالت القيادية في البام ل"كود" "كيفاش رئيس الحكومة كيعطي التعليمات وكيتناقض مع وزيرو. الدستور عطاه الحق يراسل الملك ويغير الوزرا اللي ما عاجبينوش، ماشي يجي للبرلمان ويبين للمغاربة باللي هو الله يعمرها دار واللي معاه ما مخلينوش يخدمو" يضيف القيادية ل"كود".
نقطة اخرى اغضبت كثيرا البرلمانية في "البام" يتعلق الامر بما سمته "لكلام لقبيح" اللي كالو رئيس الحكومة عندما قال "سيدنا اختارني" وردت عليه عبر "كود"، "سيدنا ما يختارش الاشخاص. راه حنا فبلاد المؤسسات ومن نهار وصل للحكومة امنا بهاد المؤسسات وبالديموقراطية".
الشق الثاني من غضب المنصوري هم موضوع التعليم اللي هي عضوة فمؤسسة دستورية هي المجلس الاعلى للتربية والتكوين والبحث العلمي. وقالت المنصوري ل"كود" "ما خاصش الايديولوجيا تتحكم فالتعليم. وحشومة وعام يلخصو فقضية الانضباط والحضور". المنصوري اوضحت اننا "بحاجة الى رئيس حكومة يلقى للحلول لمواضيع كبيرة بحال هادي" و"انه كيتخلص من الدولة وصوت عليه المغاربة باش يلقى هاد الحلول ماشي يجي يدير الحلقة".
وانتقدت المنصوري بشدة طريقة تعامله مع موضوع حساس للغاية مثل التعليم "عندنا 15 بالمائة هي نسبة البطالة اغلبها وسط شباب متعلم وكاينة 35 بالمائة ديال البطالة في اوساط الاطر. كيفاش وصلنا لهاد النسبة؟ حقاش تعليمنا لا يتماشى وسوق الشغل. بمراكش اللي سيرتها سوق السياحة محتاجة لاطر لتدبيرها ولكن هاد الاطر خاصها تقرا التدبير ويكون عندها اللغات" تضيف المنصوري ل"كود".
اللغات كانت نقطة اخرى اثارتها العمدة السابقة لمراكش بخصوص تدخل رئيس الحكومة "العربية لغة رسمية في الدستور ولكن ياك دولتنا اختارت تكون فقلب النمو الافريقي كيفاش دير مهتمتها باللغة العربية وبلا انفتاح على اللغات مثل الفرنسية والانجليزية" تضيف المنصوري ل"كود".
واعتبرت ان اللغة من معضلات التعليم واعتبرت تصريح بنكيران في البرلمان "تشجيع للتعليم الخصوصي" وتساءلت ما اذا كان بنكيران يرغب في القضاء على التعليم العمومي "انا عندي جوجت لبنات كيقراو فالتعليم الخصوصي وتمنيت لو قراو فالتعليم العمومي ولكن ما كرهتش بحال الاف المغاربة اللي كيتسلفو باش يقريو ولادهم فمدارس تعلمهم الفرنسية والانكليزية والعربية ولغات اخرى".
المنصوري اعتبرت ان التوظيف الايديولوجي للتعليم تسبب في كوارث وسيزيد الوضع سوءا وان مهمة رئيس الحكومة ايجاد الحلول لقضايا شائكة مثل هذه لا ان يغلقها بدعوى انها "كبيرة"، وختمت بنداء الى بنكيران "ايلى كان الموضوع كبير عليك، حيد من التسيير ويجيو ناس اللي قادين عليه".