اخبار اليوم. بوعشرين ولكذوب على "كود": ايلى عندك مشكلة مع البام ما ديرناش طريق: ها حنا وها اللي كنسواو

كنا دائما نتجنب قدر المستطاع نعايرو قبيلتنا اي قبيلة الصحافيين. دابا حنا ولينا مادة للصحافة. ماشي مشكلة غير وكان كيكتبو علينا الصحيح ماشي لكذوب. نهار دخل كريم بناني رجل الاعمال واللي عندو دراية كبيرة بالصحافة راكمها هادي سنوات طويلة شريك ف"كود" اول واحد كتبها هي "كود". ماشي على شي حاجة غير حقاش بغينا نبقاو "كود" مع قراءنا مع اللي كيحترمنا وحتى اللي ما كيحترمناش.
كنا واضحين: "كود" ما عمرها تبدل خطها اللي كيعرفوه الناس. "كود" جورنال ماشي بوق سياسي. كون بغات تكون بلا ما تحتاج يدخل شريك ولا شريكة. كنا ننتظرو هاد السلوك اللي درناه يحتارموه على الاقل من يدعي المهنية. خرجات علينا "اخبار اليوم" في عددها ليوم غد الجمعة بمقال ظاهره اخباري واخا خبارو خاطئة وباطنه قليان السم وتعليق وخاوي بعنوان "نجيم يبيع "كود" الى مقرب من البام".
عنوان مسموم كيوهم القراء باللي بعنا "كود" والواضح اللي قلنا ان كريم بناني شريك.
الجريدة قالت ان "كريم بناني احد مؤسسي "اخر ساعة" =ماشي مشكل واخا السيد حياتو كلها وهي فالمال والاعمال وفالاعلانات وتعرفت عليه منذ ايام الجريدة الاولى". هنا النية العوجا والتقلاز فوق الجلابة. يعني انتي يا "كود" راه دخل شريك اللي هو من مؤسسي اخر ساعة" باش يدير ربط بين الصفقة وبين حزب الاصالة والمعاصرة. وبعد المقال على لخبار ودخل للتعليق "صفقة تجارية ببعد سياسي" ثم رجع لخبار وخاطئة. قال باللي بناني دخل ب80 بالمائة وباللي الصفقة تناهز 300 مليون. كذوب فكذوب ما على بوعشرين توفيق ناشر "اخبار اليوم" اللي بغى ينهش فلحم "كود" الا الاطلاع على الوثائق المتعلقة بالشركة وهي متاحة للاطلاع على كل شيء وهاديك الساعة يعرف خطئو.
التناقض فالخبار بل التخربيق لكبير هو هاد العبارة "ورغم هذا التحول حرص الموقع في اليومين الاخيرين على ابداء انتقاداته وملاحظاته على حزب الياس العماري وعلى قادته". كيفاش هاد اليومين وكيفاش ورغم. "كود" هي "كود" ما كتغيرش ما كتبدلش. ماشي انتي يا اخبار اليوم اللي كتنقطي الناس بقربها او بعدها مع الاحزاب السياسية. "كود" وكلناها نهار خبرنا بالشريك بعاد على الاحزاب السياسية وعلى صراعاتها وموقفنا كيف عاهدنا القراء ناخدو مسافة ونقلو للقارىء اش واقع. حنا ما بام ما بي جي دي ما استقلال ما اشتراكي موحد واخا هو الوحيد اللي كنحتارموه ودافعنا وندافع على كثير من افكاره فيما يخص المشروع المجتمعي لا فيما يخص التصور الاقتصادي.
ما تمنيتش نرد على بوعشرين ما بغيتش ندخلو فحروب قبلية حقاش عندنا السلاح باش نردو. فزمن الازمة والمشاكل شي وحدين بحال اخبار اليوم" خلات كلشي وكتعطي الدروس للصحافيين وكتعطي درجة القرب والبعد من الاحزاب وديوها فريوسكم وفمشاكلكم ولا قلبتو علينا راه حنا موجودين