سكوب. اش واقع فمملكة محمد السادس وعلاش كثرو الرحل. 11 البرلمانيين استاقلو من مناصبهم شهر قبل نهاية ولايتهم وغالبيتهم استقلاليين وكلهم معولين على المجلس الدستوري اللي غادي يصدمهم بهاد القرار

علمت "كود" ان استقالات اعضاء مجلس النواب في تزايد. فبعد استقالة كل من الاستقلاليين خالد السبيع وحسن الثاني والحركي عبد القادر تاتو تلقى مجلس النواب بداية الاسبوع سبع استقالات لكل من ابراهيم الشكيلي ورشيد الحموني ومريم ولهان وهشام هرامي وعبد الحق شفيق وابركا عبد الله وسعيد الدور والعلالي محمد.
هادو غالبيتهم من حزب الاستقلال. كثير منهم حسب مصدر "كود" ناوي يتقدم للانتخابات التشريعية مع احزاب اخرى يعني هادو غالبيتهم رحل. خالد السبيع كان صرح ل"كود" انه غادي يموت استقلالي وانه استقال لاسباب شخصية ومهنية. كيفاش تبقى ليك قل من شهر للولاية وتستاقل لاسباب شخصية؟ هادي صعيبة.
علاش هادو استاقلو وبغاو المجلس الدستوري يصدرهاد العبارة تبعا لاستقالتك من مجلس النواب يجرد من صفته. يعني انه ما يبقاش مع حزبو ويدي هاد الورقة باش يترشح بيها فين ما بغى
حسب مصدر "كود" فان المجلس الدستوري يتجه الى رفض هذه الاستقالات كما فعل مع استقالات اعضاء مجلس المستشارين سنة 2011. حينها دارو مستشارين نفس القالب ورفضو المجلس. حسب مصدر "كود" فان موافقة المجلس الدستوري على هذه الاستقالات سيؤثر على سير المؤسسات الدستورية. شي شباب ولا نساء فاللائحة النسائية غادين يتحرمو من حظوظهم. حقاش الى تقبلات استقالة هاد العينة من قبل المجلس الدستوري اللي تابعهم فاللائحة غادي يولي نائب في مجلس النواب شهر واحد وما يبقاش عندو الحق يترشح فالانتخابات المقبلة. ها علاش ما تعولو على والو وبلا ما تبقاو تستاقلو راكم كتشوهو غير ريوسكم