المثل العربي الشهير كايقول :”يوجد في البحر ما لا يوجد في النهر”، علاش ذكرت هذا المثال، حيث بغيت نهدر على واحد الشاب مغربي طموح والماكينة ديال الأحلام ديالو لا تتوقف… هذا الشاب سميتو علاء حميوي شاب مغربي من مدينة سلا والأصول ديالو تترجع لواحد الفيلاج صغير وزوين سميتو مقريصات، كاين في منتصف الطريق مابين وزان وشفشاون في أعماق الجبال. هاد الولد كان كايقرا في فرنسا ولقا خدمة زوينة في عاصمة الأنوار والحضارة باريس، كايربح منها ماتيسر ويعيش منها. غير وكان اللي ماكدخلش لبنادم في الراس هو كيفاش هاد الولد سماح في خدمتو وفي واحد المكان اللي الكل يحلم يوصل ليه وفي واحد التخصص اللي هو ديال الوقت هو الاعلاميات. هنا كانلقاو الجواب عند علاء باللي أنه واحد النهار جات ليه فكرة الرأس: كان كايخدم في واحد المنطقة اللي معروفة بالاكتظاظ في باريس والناس شي كايجري وراء شي بحال الروبوتات، كان خدام في لاديفونس واللي كايعرف هذا الحي راه هو القلب المالي ديالها وفيه كاين البزنس وما جاوره. كان كيتأمل داك الناس كيفاش كايجيو في الصباح في نفس التوقيت وبخرجو يكميو مع العشرة وفي نص النهار كلشي كايخشي في وجهه داك السندويتش ملوي في الكاغيط وفي العشية كلشي راجع في الميترو بوحد الميكانيكية والروتين لافتين للنظر… واش هادي هي الحياة! المهم قرر أنه يتخلا على خدمتو ويرجع للمغرب ويدير شي حاجة شخصية من بنات أفكار ومن داك الشي اللي تعلم وقرا وشاف في الدنيا. الفكرة كانت أنه يدير واحد المشروع سياحي سماه “دجبلي كلوب” في علاقة مع المنطقة اللي هي كاتنتمي لجبالة وفي علاقة أيضا مع الثقافة اللي هي الفِنْ والشغف ديالو. وبما أن الوالد ديالو أستاذ فكان أكثر قابلية واستعداد أنه يتقبل “الحماق” ديال علاء ويمشي معاه في الخط … أول حاجة إيجابية في طريق الإنجاز من بعد الإصرار والإيمان بالفكرة والتشجيع ديال العائلة هو القطعة ديال الأرض اللي بنا عليها المشروع حيث الوالد ديالو أصلو من هاد الفيلاج مقريصات وبالتالي كانت القضية ساهلة. الفكرة كانت هي أنه يدير واحد المشروع الهدف منو ماشي هو الربح واللعاقة حيث اللعاقة والثقافة في بلادنا قليل فاش كايتفاهمو، ولكن مشروع تضامني وفريد من نوعه من حيث الأهداف ديالو، حيث مقريصات واحد الفيلاج معزول في الجبل وميت من حيث الفرص اللي تتاح لشباب المنطقة من أجل الانفتاح على العالم الخارجي وقليل فاش كايكون شي حاجة ثقافية باستثناء واحد الجمعية اللي كاتنظم واحد المهرجان من الصيف لصيف، قرر علاء يدير حملة ديال المساهمات على النت ويروج للمشروع باش يبدأ الخدمة. الحاجة اللي يمكن يقدمها لشباب المنطقة وهي القيمة المضافة اللي يمكن يقدمها ويتميز بها دجبلي كلوب كانت هي المنتوج التقافي بمختلف أنواعه. كاتبان الفكرة شوية حمقاء حيث الشباب في المنطقة أغلبهم كايهاجرو نحو طنجة أو لمدن أخرى باش يلقاو الخدمة… لأان مقريصات مافيها والو بالمعنى الاقتصادي رغم المؤهلات الطبيعية وأشجار الزيتون وبعض الأشجار الأخرى المثمرة. الأهم أن كل واحد جاي لجبلي كلوب ما مطلوبش منو يخلص الفلوس باش يبات وياكل ولكن يقدم شي حاجة اللي تنفع الساكنة وخاصة الشباب من داك الشي اللي كايعرف فيه وكايتميز فيه من موسيقى أو مسرح أو تنشيط تربوي أو تصوير أو صباغة .. إلخ، وهكذا دازوا بزاف ديال الفنانة من دجبلي كلوب من موسيقيين ومصورين وناشطين جمعويين… كل واحد خلا شي حاجة لدوك الشباب، وهكذا كا يمكن كيف ما يقول علاء نقطعو مع السايحة السلبية اللي كاتخلي وراها غير مخلفات الاستهلاك بلا ما تخلي شي أثر في الناس اللي مجاورين المشروع. من بين الحاجات اللي كاتميز هاد المشروع هو أنه اعتمد على أغلب المواد المحلية من البداية حتى النهاية، البيوت ديالو مبنية بطريقة تقليدية كيف ما كانو الناس القدامى يبنيو ديورهم بالحجر اللي متوفر بكثرة في المنطقة، والقصب والخشب والطوب المصنوع محليا من التربة، وحتى الماكلة أغلبها من مواد محلية كايتقضاها من السوق الأسبوعي من عند الفلاحة بالإضافة لبعض المنتوجات اللي تنتج داخل دجبلي كلوب، والهدف طبعا هو احترام الشرط البيئي وتقديم منتوج سليم تجاه البيئة ونظيف أخلاقيا وتوفير جو من الراحة والهدوء بعيد على المدن الكبية اللي فيها كثرة الصداع والضغط والروتين لكل واحد قرر يزور المنطقة وبعد شويا من حريق الراس. مثل هذا المشاريع ومثل هذا الأفكار مزيان يتعادى بها بنادم باش حتى هو يدير شي دفيعة مهما كانت صغيرة لهذه البلاد اللي خصها بزاف بزاف ديال الحاجات وخاصة العالم القروي..
