بلخياط ل”كود”: ليزيكو غادية تبقى ورقية وباغيين نديرو اذاعة

قال منصف بلخياط الرئيس المدير العام للمجموعة الاعلامية الجديدة بعد دمج مجموعته مع “ساهام ميديا فوند”٬ ل”كود” ان المجموعة الجديدة اللي فيها 81 صحافي غادية تدخل فمشروع باش تقوي كاع الصحف اللي كاينة بالاضافة الى خلق مواقع متخصصة اخرى. كما اعلن في تصريحه ل”كود” ان المشروع المقبل غادي يكون اذاعة خاصة.
بلخياط اكد ل”كود” ان جريدة “ليزيكو” الورقية غادية تبقى وان جميع المواقع الاخبارية التابعة للمجموعة حتى هي غادية تبقى وان هاد المجموعة الجديدة غادية تحافظ على جميع مناصب الشغل بل غادية تقويه عبر خلق مواقع اخبارية جديدة.
المجموعة الجديدة فيها بالاضافة الى “ليزيكو”٬ “اوريزون تيفي” و”لوسيت انفو” و”اولا” وشي تخربيق اخر.
منصف بلخياط ولى اهم مساهم فمجموعة اعلامية جديدة قبل ما يسالي هاد العام. فمن خلال شركتو "كروس وورد" ولى كيملك 51 بالمائة بعد اندماج مواقع اخبارية لهاد هاد الشركة و"ساهام ميديا فوند" اللي كانت كتملك "لزيكو" و"اوريزون تيفي". ساهام غادية تبقى عندها 34 بالمائة فيما باقي اسهم المجموعة الجديدة غادية تكون موزعة بين "سانام" ديال سعيد لعلج والصحافي سمير شوقي.