ها لعب الدراري فين يوصل. مسيرة الرباط غادية تخاصمنا مع مصر والسعودية الامارات. صوروهم صهاينة كيضرو فلسطين فمسيرة شاركات فيها الحكومة والمعارضة وهيمنات عليها العدل والاحسان =تصاور

مسيرة الرباط باش تقول اللا لصفقة القرن” اللي كانت اليوم عرفات تصرفات غادي يكون ثمنها غالي علي المغرب. دارت مسرحية سبو فيها المحمدين: ابن زايد ديال الامارات وبن سلمان ديال السعودية بالاضافة الى عبد الفتاح السيسي رئيس مصر. بينو باللي كراكيز لدونالد ترامب رئيس امريكا وبنيامين نتانياهو رئيس وزراء اسرائيل.
هاد الصور داروها صحاب تيار تركيا قطر واللي كيدافعو عليهم. اييه كانت حالات معزولة ولكن فدول ماعندهاش مع الديموقراطية ما غادينش يفهمو باللي هاد الشي داروه ناس ما عندهم علاقة بالدولة. شكون غادي يفهم باللي السيسي كيبوس يد محمد بن سلمان قدام محمد بن زايد وباللي هاد الشي غير تمثيل.
غاديين يعززو هاد الشي ديال مؤامرة من الرباط بمشاركة احزاب مشاركة فالحكومة. نائب الامين العام لحزب العدالة والتنمية سليمان العمراني كان فالصف الاول حدا فتح الله ارسلان القيادي فالعدل والاحسان. شاركو احزاب الاتحاد الاشتراكي والتجمع الوطني للاحرار والتقدم والاشتراكية والاستقلال بالاضافة الى النقابات….
صعيب تقنع هاد الدول باللي هاد الاهانة ضد رموز بلادهم جات من قبل افراد فقط. حقاش ما جا حتى حد حيدها او طلب من اللي دايرها يوقفها.
دابا المغرب بان منخارط مؤخرا فالتشديد انو مع القضية الفلسطينية. رئيس الحكومة الامين العام لحزب العدالة والتنمية سعد الدين العثماني اعلن رفضو لصفقة القرن ودافع على المشاركة فهاد المسيرة. اذن المسؤولية كاينة.
دابا كيفاش غاديين نديرو مع الامارات والسعودية ومصر. فمسيرات بحال هادي خاص كلشي يكون مضبوط. تصرف صغير من شي متهور ثمنو يقدر يكون غالي. عندهم باش يقصحونا. الصحرا مثلا