شوف فين وصلنا.. نائب امزازي فسلا عيط لمدير مؤسسة فالتلفون عرق ليه و سبو بكلام طايح هاذ الشي يا حسرة وقع فقطاع سميتو التربية و التعليم

المكتب الإقليمي لجمعية مديرات ومديري المؤسسات التعليمية بالمغرب، دار بيان على واقعة خطيرة، بعدما المدير الإقليمي ديال سلا عبد الرحمان بليزيد عيط لمدير مؤسسة تعليمية و سبو، و سب ليه مو و جدودو، و مخلا ليه غي اللي نسى.
المكتب الإقليمي ديال سلا ندد بهاذ السلوك اللي وصفو بالمشين و هدد باتخاذ كل الاجراءات الضرورية القانونية و النضالية.
هاذ القضية ديال السبان معروفة على المدير الإقليمي ديال سلا، خاصة مع الموظفين الصغار، كيسب بكلام سوقي بحال دينمك و دينمو، و لحمار بوه، و نربي مو، و الكلب اللي ولدك، ونعفي مو وزيد… وزيد.
هاذ المسؤول أصلا وصل للتقاعد ومازال خدام حيث مددوا ليه وزادوه عامين… وهو كيعتبر معندو ميخسر داير مبغى وحاكر على عباد الله.
الكرة دابا فملعب الوزارة واش بحال هاذ المسؤولين هما اللي غادي نصلحوا بهم القطاع، واش اللي مقادرش يحترم الناس ممكن نعولوا عليه.
نعم للحزم و الصرامة، و لكن الاسلوب خاص يكون فيه الاحترام ومراعاة كرامة ومشاعر الناس حيث باش تكون مسؤول فقطاع سميتو التربية خاصك تكون قدوة في التربية.
دابا بحال هاذ الشي كتعفي عليه الوزارة مدير و كتعاقب استاذ و لا اداري، و لكن واش نائب الوزير عندو حصانة. وعلاش كتنوض القيامة ملي كيزبلها تلميذ.