عاقو بيه واليديه بسباب حملة التشهير اللي طالت المثليين.. شاب مثلي انتحر فالرباط

علن الكاتب المغربي هشام الطاهري، فالحساب ديالو الرسمي على موقع التواصل الاجتماعي "تويتر" بللي صديق ليه مثلي انتحر، بعدما عاقو بيه واليديه.
وقال الطاهري بللي الشاب، اللي فعمرو 21 عام، انتحر ف17 أبريل بعدما انتشرو تصاورو على نطاق واسع فمواقع التواصل الاجتماعي، والخبار وصل لوالديه، وتشوه مع دارهم وكَاع عائلتو.
الشاب، اللي كيقرا ففرانسا وجا للرباط مؤخرا، وماقدرش يرجع من بعد ما تم الإعلان على الحجر الصحي، لقى فالانتحار الوسيلة الوحيدة اللي تريحو من كلام العائلة والشوفة دالناس.
وكان سبق للكاتب المغربي، عبد الله الطايع، شار لهذ القضية حتى هو، فتدوينة ليه ف"فيسبوك"، وتكلم على انتحار مثليين كثار، فالوقت اللي خرجو فيه وحدين خرين للزنقة فهذ الفترة دالحجر الصحي، وتشردو.
وهذشي كامل بسباب المتحولة صوفيا طالوني اللي دارت فيديو ف"أنستكَرام"، تكلمات فيه على التطبيقات اللي كيدخلو ليها المثليين، وهذشي خلا الناس ياخدو تصاور المثليين من هذ التطبيقات، ويبارطاجيوهم فمواقع التواصل الاجتماعي، ويسبوهم ويشوهوهم.