ميزانية 2021.. بضغط من الباطرونا: الإعفاء الضريبي لمالين تربية الخيول لي كيشاركو فالتيرسي والمسابقات

صادقت لجنة المالية بمجلس النواب، اليوم الثلاثاء 8 دجنبر الجاري، على تعديل يقضي بإدراج تربية الخيول ضمن المنتجات الفلاحية المعفاة من الضرائب في مجملها.
لجنة المالية صادقت على التعديل، في إطار القراءة الثانية لمشروع قانون المالية لسنة 2021، بعدما داز فمجلس المستشارين لي دخل تعديلات مهمة من أبرزها تعديل المادة 46 من مدونة الضرائب، ولي كتقضي بإعفاء مالين تربية الخيول من الضرائب.
أصوات برلمانية كتقول بلي هاد الاعفاء ماشي منطقي ولا يتناسب مع الوضع الاقتصادي فالمغرب، خصوصا وأن الخيول ماشي منتجات كيستهلكها المغاربة بزاف.
في المقابل يرى البعض أن قطاع الخيول تضرر بزاف فهاد كورونا ومزيان يكون اعفاء ضريبي ليهم السنة المقبلة.
التعديل جابتو الباطرونا ودوزاتو فمجلس المستشارين رغم تحفظ البي جي دي عليه، لكن داز. ودبا صوتات عليه لجنة المالية.
تربية الخيول كتنظمها الشركة الملكية لتشجيع الفرس لي تأسست ف 2003، وهي مقاولة عمومية تابعة لوزارة الفلاحة والصيد البحري. وتتجلى مهماتها في ما يلي : تأطير تربية الخيول وتحسين سلالاتها في المرابط الوطنية، تنظيم سباقات الخيول في المضاميروالحلبات الخاصة، تدبيرالرهان، انجاز واستغلال البنيات المتعلقة بتنمية وتشجيع مجال الخيول والفروسية.
"كود" اتصلت برئيس الشركة الملكية لتشجيع الفرس، مزال مجاوبش، باش نعرفو الرد ديالو فهاد التعديل المهم لي داز اليوم فالبرلمان.