علاش شي يساريين و اسلاميين كايهضرو بسميت الشعب المغربي باش يقولو انه الشعب ضد التطبيع مع اسرائيل ! شكون قاليكم بلي الشعب المغربي ضد التطبيع ؟!المغاربة اصلا شعب برغماتي ماعمر ماكانت إسرائيل عدوة ديالو ! العدو ديالو الحقيقي هوا الزلط و القهرة !

نايضة تخوين و معيور و سبان فالمغاربة لي مع التطبيع! شي يساريين و اسلاميين ماكايعرفوش شي حاجة سميتها الرأي و الرأي الآخر ! لا عندهم نتا مع التطبيع اذن نتا خائن للقضية الفلسطينية و ديوث و عميل د الصهاينة و ماعندكش القلب و المبادئ ! و شي وحدين مشاو بعيد خصوصا السلفيين و بداو كايكفرو لي مع التطبيع گاع هوما و بغاو يخرجونا من الملة !
مافهمتش هاد الگنوس علاش دينمهم باغين كلشي يشبه ليهم ؟ باغينا كاملين نكونو ضد التطبيع بزز ! آ سيدي انا مغربية مع التطبيع و اصدقائي و الناس لي كانعرف مع التطبيع ! واش غير حيت مع التطبيع بغيتو تحيدو ليا الجنسية و لا كيفاش ؟! باشمن حق ؟! وشكون عطاهم الحق يغوتو ! "الشعب المغربي ضد التطبيع" ! و يهضرو بسميت الشعب المغربي ! واش سولو الشعب ؟ سولو ثلاتين مليون نسمة على الرأي ديالها فالتطبيع وواش مع او ضد ؟
اصلا خليونا نطرحو السؤال الحقيقي! ايمتا كانت اسرائيل عدوة للشعب المغربي ؟! ايمتا ؟ ماعمرها كانت عدوة لينا ! غي تاحنا فحالنا فحال گاع الشعوب العربية ! كانو منعسينا بالقضية الفلسطينية و اسرائيل و كدا لتصريف الفشل الداخلي ديال الحكومات و الانظمة السياسية ! عوض انك تفكر فالازمات الداخلية ديالك كاتفكر فواحد القضية لي بعيدة عليك كل البعد و عندها ناسها قادين بيها.
ماعمر ماكانت اسرائيل دولة عدوة للمغاربة و ماعمرها آذاتهم فشي حاجة ! العدو الحقيقي و الأبدي ديال المغربي هوا الزلط و القهرة ! المغربي باغي يعيش مزيان بكرامة ! ياكل ! يلبس ! ولادو يقراو بمستوى مزيان و فاش يمرض يلقا مستشفيات يتداوا فيها و هادو هوما القضايا الحقيقية لي خاص المغربي يركز عليها و يضيع فيها وقتو و جهدو ! اما مسألة اسرائيل و فلسطين لي غادي نقدرو نديرو فيها هوا اننا نعاونو فايجاد حل في اطار المفاوضات و نخيطو بخيط بيض لالقينا مانخيطو بين دوك الناس! أما العداوة مع اسرائيل راها كاينة غي فالعقول الخامجة ديال الاسلاميين لي كايكرهو " اليهود" ماشي الاسرائليين و كايقولو عليهم " حفدة القردة و الخنازير" و ديك الهضرة ديال القرن جوج لي تقولها فشي بلاد كاتحتارم رسها غايضربوك بالحبس بتهمة معاداة السامية ! و كاينة طبعا حتى فالعقول ديال اليساريين لي كلاو و شربو و استرزقوا بهاد القضية !
ماعمر ماكانت اسرائيل عدوة مول الحانوت و الخضار و النجار و البنكي و الطبيب المغربي ... العدو الحقيقي هوا الفقر و البطالة و القهرة ! ايوا فيق آ البريق !