الطبيب حمضي حتى هو هضر على الفايك نيوز اللي مسركل فواتساب على كورونا اللي كيشكل خطر على صحة الناس: قالو سنغافورة شرحات موتى كورونا واكتشفات أن الفيروس ماكاينش.. هذشي كذوب والأسبيرين ماكيعالجش بوحدو من كوفيد

نفى الطبيب والباحث في السياسات والنظم الصحية، صحة ال"فايك نيوز" المتداول بشكل كبير على مواقع التواصل الاجتماعي، بخصوص توجيهات جديدة صدراتها سنغافورة، من بعد ما دارت تشريح طبي للناس اللي ماتو بكوفيد 19، ضدا على منع منظمة الصحة العالمية، كيف ورد فهذ الخبر الزائف.
"الفايك نيوز" كيقول أن وزارة الصحة والخبراء فسنغافورة لقاو بللي المرضى ماكيموتوش بكوفيد 19، بل ماتو بباكتيريا ماشي فيروس، هي اللي كتعطي تختر ديال الدم، وهذشي علاش وزارة الصحة بدات كتعطي غير الآسبيرين للمرضى وبداو يبراو..
وقال حمضي، فأوديو ليه معمم على الصحافة، أن هذ الفايك نيوز كيدور من شهر أبريل 2020، مللي بدا الوباء كينتشر عالميا، وفاللول كان الميساج كيقول أن الاطباء في إيطاليا جراو التشريح وانهم لقاو هذشي، ومن بعد قالو روسيا، وبريطانيا، ودابا سنغافورة.
وكشف أنه فالواقع مامنعاتش منظمة الصحة العالمية التشريح فأي يوم من الأيام، باش يدار التشريح، والناس اللي كيموتو بكوفيد كيخضعو للتشريح بحالهم بحال جميع المرضى.
وقال أن ماشي هذشي اللي كيقتل، بل كوفيد هو اللي كيقتل، وكيمشي نيشان للرية والقلب، ولكن معروف كيعطي حتى التختر ديال الدم، وفالمغرب كيتعطا الأسبيرين وأدوية اخرى من شهر مارس 2020، وهذي ماشي حاجة جديدة.
وبالنسبة للباكتيريا، قال حمضي أنه كيمكن لناس مصابين بالفيروس، وماشي كلشي، يتعرضو للباكتيريا هذشي علاش كيتعطى الأونتيبيوتيك عند بعض الناس.
"لا روسيا ولا سنغافورة ولا بريطانيا، كلهم كذبو تكذيب شامل هذ الأخبار، وعمر سنغفورة صدرات شي بلاغ على هذشي، ولا دراسة ولا قرار... والو، أما إلى كان الواحد عندو الشك فكوفيد وياخد الاسبيرين فهذا خطأ كبير جدا"، حسب تعبير حمضي.
وشدد حمضي انه بحال هذ الأخبار الزائف كيخص الجواب عليها، حيت "حنا فمرحلة انتشار الفيروس، وعدد من الناس يقدرو يتيقو هذشي ويتصابو وياخدو الأسبيرين وانتهى الأمر، وهوما راه كينشرو الفيروس فالمحيط ديالهم والحالة ديالهم كتدهور وغيمشيو مأخرين للمنظومة الصحية باش تتكفل بيهم غيكون مشا الحال"، على حساب هضرتو.
وكان سبق لبدر الدين الداسولي، رئيس النقابة الوطنية لأطباء القطاع الحر، نفى، فتصريحو ل"كود"، هذ صحة هذ الخبر المتداول، وقال أن القول بأن كورونا ماشي فيروس كلام على عواهنه، "هذا فيروس مافيهش المزاح، وإلا ماكانش تحليل الPCR ديال الفيروسات تخرج عند الناس الإيجابية فاش كيكونو مصابين، لو كان ماشي فيروس كان كلشي يخرج مصاب"، حسب تعبيرو
وزاد الداسولي ان هذشي اللي كيقولو جابتو سنغافورة ماشي جديد، وماشي لأول مرة كيتم تشريح مصاب فالعالم بكورونا فسنغافورة، بل شرحات إيطاليا بزاف ديال المصابين، وهوما اللولين اللي بداو، وعرفو أن الأوعية كيوقع فيها تجلط الدم، وحقيقة إصابة المصاب بهذشي ماشي سر.
"راه حتى حنا فالمغرب كناخدو الأسبيرين المضادر لتختر الدم، وضروري ما تعطى معاه مضادات حيوية، حيت المرض ماكيديرش غير هذشي، بل معروف أنه كيدوز من 3 مراحل: مرحلة الأعراض، والتهاب الكبير اللي كيتضرب للصدر، وعاد تجلط الدم"، كيف شرح الداسولي.